Sorkari Pak nung aliba India tsür ka yaritsü melunger

New Delhi, August 03 (Agencies): India sorkari Pakistan nung küm 15 tashi alir India tsür tenarong tajak aser temeli tasük ka lar kinüngertem den tanaben lungjemtsü atema yaritsü melungogo, ta osang ka ajanga ashi.

Osang ajanga ashiba agi, Hombar nü External Affairs Minister Sushma Swaraj-i twitter ajanga, Pakistan nung Indian High Comission ajanga India tsür laji ajurutsü aser la yaritsü merangtsü ta osang jangjatsüogo.

“Ni Pakistan nung Indian High Commissioner Dr TCA Raghavan dang Karachi-i oor iba testürlaji ajuruang ta shiogo,” ta Swaraj-i twitter ajanga ashi.

Iba dak sentakba nung meimchir temeten asoshi inyaker züngsem aser Pakistan nung taoba minister Ansar Burney-i tasüngdangba ka benokba langzüdang External Affairs Minister Sushma-i aji oda langzüogo.

Pakistan nunger meimchir temeten atema inyaker kari, küm 15 tashi Pakistan nung alir tenarong tajak aser temeli tatsük India tsür laji tangbo küm 23 jungogo aser laji yaritsüla, ta jembiba nungi tang osang tasen ya angazüker.

Tetsürla lar kinüngertem den lungjemdaktsütsü asoshi mera agiba ya Bollywood film ‘Bajrangi Bhaijaan’ kanga takok anguba sülen iba dak sentakba nung mera agir lir.

Express Tribune osangkaket ajanga ashiba agi, iba tetsürla ya la lanuwa Pakistan litsü telungi ia liasü.

Iba sülen Pakistan Ranger temi la Lahore centre of social welfare group, Eidhi foundation dangi anir oa liasü.

Iba foundation nung Faisal Eidhi-i ashiba agi, lar kibong bushiba mesüra la aliba jila metettsü merangba ajak amajok dang liasü.

Tetsürlaji mezüng Lahore nung Edhi Centre kati anir ao, iba sülen Karachi-i anir ao aser Bilquis Edhi-i la nem tenüng tasen ‘Geeta’ agütsü.

La temeyong amshia Geeta-i la adianu tenet aser aianü pezü lir ta shiogo.

Meimchir temeten asoshi inyaker aser Pakistan nung taoba minister Ansar Burney-i küm asem tejaklen India semdangba mapang Geeta onük süoka liasü, aser tang pai la atema Facebook campaign ka tenzükogo.

Foundation züngsemtemi Geeta dang Hindu nunger ka den kibong kümer Pakistan nung taküm tasen ka tenzükshitsü asüngdang, saka lai temaitsü amshia sayuba ajanga, la kidangi shilangba sülen ang kibong akümtsü ta shiogo.

Salman Khan-i tongti shilem agiba film ‘Bajrangi Bhaijaan’ nung Pakistan tsür temeli tatsük ka India nung samar, aser Salman-i timtem jenti ajurua tatemsa Pakistan nung lar kinüngertem den lungjemdaktsür.