MSTK Culture Society küm 25 ajungba benjung amung

August 2, 2016 nü Kohima Indoor Stadium nung MSTK Culture Society silver jubilee aser Tsüngremmong benjung na repa amungba sentong nung sobaliba yimya nung shilem agiba noksa angur.

Kohima, August 2 (TYO) : Mopungchuket Senso Telongjem Kohima (MSTK) Culture Society tanü Mongulbarnü kanga pelatepa, Kohima Indoor Stadium nung silver jubilee aser Tsüngremmong benjong na repa amung.
MSTK Culture Society ya sobaliba ajungkettsü aser wazüka ayutsü nükjidong nung 1991 küm tentet. Iba mapang nungi tenzüka parnoki sobaliba sobutsü aser osettem bendena itemji wazüka ayutsü tenzük.
Parnoki 1991 nungi 2016 tashi, küm 25 tsüngda inyaka aruba otsü “Lahbe 1” ta tenüng agütsür DVD ka adoka lir.
2015 küm iba telok yagi Zubza semdanga yangji aliba nüburtem alu inyakyim aser koma tsünüsemponger itemji metetbela liasü. Parnoki iba semdangbaji DVD ka nung “Lahbe 2” ta tenüng agütsür adoka lir.
Home & Irrigation & Flood Control, Secretary, Bendangkokba-i, sobaliba teraji sobaliba sobutsü sobur yar-tsüngsang ken tena tsüngsangtepbaji masü ajisüaka aseni inyakba ajak agi sayur, ta ashi.
“Asenoki asen sobaliba ya khen jungjunga meshiteta angatetshir lanurtem ajanga alima rangben nung iba osang proktsü nüngdak,” ta pai ashi.
MSTK Tir Maongtemjen Aier-i, asen tetsü-tebou aser tsüraburtem dang nungi angazükba sobaliba tajung aika tanü alima kanga kara aienba den külemi tanem tanemi sama yonga odar, ta ashi.
Pai nüngo (souvenir) committee-i tarutsü nüburtem ajakzüktettsüsa nüken belem arema sobaliba kaket adokba atema pelaba lemsatep.
Jubilee sentong nung Principal Director Health & Family Welfare, Dr.L. Watikala-i Jubilee nüngo, Additional Development Commissioner (Planning), Aolemla Jamir-i Sobaliba kaket aser Labour Commissioner Nungshiyanger Aier-i Lahbe-2 DVD sayatsü.
Iba sentong nung Jubilee planning committee, Temjensashi Jamir, Longmiasang Cultural Society Dimapur, MALT Kohima, Aotemolungtsiir Telongjem Kohima aser K. Imnajungba Jamir nungeri sobaliba yimya nung shilem agi.
Chubatoshi Aier-i tarurtem pela agizük aser K. Tali Jamir-i MSTK Culture Society tenzükba otsü ashi.
Iba sentong A. Temjen Jamir-i ketdang asü aser Aotemjen Jamir-i tepela o jembia  sentong tatem nung lokti benjung chiyutep.