State 9-i maongka balaka meshir: Naidu

Vijayawada, August 07 (Agencies): State teku-i Centre dang “Special Category State” jenjang meshiogo aser parnoki Andhra Pradesh nem iba jenjang agütsütsü pusemogo, ta Union Urban Development Minister, M Venkaiah Naidu-i ashi.
Tanü Vijayawada anasa Atkuru yim nung par kibongi Swarna Bharat Trust agütsüba sentong nung osangbenertem den jembidang pai, “Parliament nung Andhra Pradesh atema maongka balala agütsütsü asoshi jembidang state tekui pusemogo, ajisüaka parnokia (state 9) maongka balakaji aginer. Item state nungi Chief Minister karibo iba atema Centre sorkar dangi shidi züluogo,” ta ashi.
Minister-i, maongka balakaji mozü ka masü, ta ashi.
“Atangji, maongka balaka ajanga tajangzük karbo angur. Ajisüaka ibaji mozü ka masü,” ta pai ashi.
AP nem maongka balaka agütsütsü onük dak sentakba nung Union Minister-i, 14th Finance Commission-i benokba sülen tarendaktsü ka adokogo, ta ashi.
“Ato kilonseri (AP) Chief Minister dang iba indangji shiogo, ajisüaka pai tekaratiba nung maongka balaka atema telemtetba aginer,” ta paisa ashi.
“AP state ana küma lemdangba ajanga saru sentsü küpdoktsü atema Finance Commission-i tebilemba kar benokogo aser Centre-i ibaji shisadangdar,” ta Naidu-i ashi.
Andhra Pradesh nungi Telangana state tentetba mapang nungi parnoki maongka balaka meshia arudar.