MKT-i ayonga Mongsenyimti nung MAIETAM tenzükogo

MAIETAM nung Board of Trustees Züngsem (Noksa tabelen nungi) Sp. Putiwapong Ozükum, MKT, President, taoba NSF President Wb. Tongpang Ozükum, Wb. I. Meyionen Jamir, MAIETAM Convenor, Dr. Sunepsungla Pongen, Wt. Toshinaro Jamir aser Wb. Imotong Pongen nungertem angur.

Mokokchung, Aug 07 : Mongsenyimti Kaketshir Telungjem-i ayonga Mongsenyimti Kaketshirtem shisaluyimba tajangzük tali jangja-a angateta aser meranga azüngba ajanga “Tetangshi Kaketshir” ka-ka kümdaktsütsü omen nung ajemdaker Trust Award ka MARTEMSU AND IMSUTOLA EDUCATIONAL TRUST AWARD MONGSENYIMTI (MAIETAM) nüngja agütsür tenzükba sentong ka August 6, 2016 anepdang Mongsenyimti Community hall nung agiogo.
Sentong nung Wb. I. Meyionen Jamir, Director & DIGP, Vigilance & Anti-Corruption Nagaland, Kohima aser MAIETAM convenor ajanga Award inyakyim indang jembidang Asür Martemsü, shiba dang S. Mar Jamir ta ajar pa ya Mongsenyimti nunger rongnungi mezüngbuba Graduate asüsang lir aser pa kinungtsü Imsutola shiba dang L.I. Atola Jamir ta-a ajar la ya Mongsenyimti-tsür rongnungi mezüngbula Matriculate lir aser tena nüngtem iba award nüngja jateta agütsür ta ashi.
Paisa, Iba Trust award ya Mongsenyimti süngkümshi telungtet nung aliba school ajak nungi class 1-9 nung tematiba jenjang angur (class toppers) nem aser Nagaland Board of school Education (NBSE) kübok agiba High School Leaving certificate (HSLC) tatidang nung temaba jenjang angur (Toppers) nem agütsütsü ta ashi.
Iba Trust award agütsütsü atema telemsaji class 1-7 nungi class topper shia nem sen 3000/- den certificate, class 8 & 9 class topper shia nem sen 5000/- den certificate aser HSLC Topper shia nem sen 10000/- den certificate agütsütsü ta paisa ashi.
Iba Trust Award tenzüktsü atema Asür Martemsu aser Imsutola-er chirnurtemi sen 500000/- (Lakh pongu) agütsüba den Trust award dak sendakba nung terenlok atema lokti, kibong aser nija kari tenla agütsünüa lira lenmang sadema lapoka lir ta paisa shia liasü.
Iba award atema taoba December 21, 2015 nung formal declaration asü aser tang ya MAIETAM nüngja jateter Constitution and Bye-laws renema “Tetangshi Kaketshir” nükjidong yur 2016 nungi mapa küma tenzüka aotsü lapokba lir.
Iba sentong Sp. Putiwapong, President MKT ajanga ketdangsüa aniba den Award nükjidong Wt. Toshinaro ajanga lemsatep, Village council Mongsenyimti nungi tajungshi O, Village Education Committee Mongsenyimti aser Wb. R. Benjungyapang AHM GHS Mongsenyimti ajanga tepela O jembia liasü.