Taila nashi kümzükertem nem temerenshi tulu agütsütsüla: Modi

Gajwel (Telangana), August 07 (Agencies): Deobarnüa Ato kilonser,  Narendra Modi-i maneni nashi kümzükertem aija, taila nashi kümzükertemi lokti aser linük nung telemsa adokdaktsütsü meranger, ta ashiba den külemi state temi parnok nem temerenshi tulu agütsütsüla, ta ashi.
Medak (Telangana) nung NTPC Super Thermal Power Project mezüngbuba phase tenzüktsüba sentong nung jembidang Modi-i, “Nüburtemi taila nashi kümzükertem dang nungi kümdanga alitsüla. State sorkartemi ozüng alema inyaker item taila nashi kümzüker ishika nem temerenshi tulu agütsütsüla. Taila nashi kümzükertemji jungkai adoktsütsü, sendoktsü aser temerenshi agütsütsütsü nüngdak,” ta Modi-i ashi.
Nashi mestübaji linük rongsen lir ta shia paisa, “Taila nashi anükertem nükjidongji linük nung telemsa adokdaktsütsü atema dang lir,” ta ashi.
Yashia Delhi nung Modi-i ‘nashi kümzükertem’ ta ashirtem timbaka ozüng alema inyakertem lir, aser iba tenüng nung parnoki dokan lapoker, ta aija liasü.