NTC-i ACAUT pusema nungiter; Sorkar nem takhangba agütsür

Dimapur, August 7 (TYO) : Nagaland nung ozüng alema totzü meyoktepa inyakyim ya tanü tasen inyakba mapa ka masü saka küm aika tetsükdaktsü melii dang inyakdakja aruba lir, ta Nagaland Tribes Council Media Cell sangdong ka nung metetaktsü.
ACAUT-i ozüng alema totzü meyoktepba inyakyim yimjak nung memetetdaktsü tashi mapang talangka iba inyakyim timtem kecha majurui dang inyakyonga aru. ACAUT-i shilem agiyonga mesüra magiyonga, iba ama ozüng alema inyak mapa putettsü aser tera nung atsüdoka endoktsübaji state ketdangsertem indang teinyaktsü mapa ka lir, ta NTC-isa ashi.
Ozüng alema totzü meyoktepba inyakyim kanga dang tajangzük ngudakja inyakyonga arudaktsü aser iba ajanga tashi aser sentsü alir kari parnok den yaritepba kuli sayur,  ta parnokisa shisem.
ACAUT-i iba inyakyim asoshi khuret bena, kanga dang nendakba bushitepa oa putetba aser aibelenertem yimjak nung metetdaktsüba atema tenüngsang agütsür. ACAUT-i kulitem agütsüba ajanga Nagaland sorkari iba khuret süoki ia agizüktsü aser aibelenertem ozüng tapet agi merenshitsüla, ta NTC sangdong nungsa metetdaktü.
ACAUT-isa iba inyakyim atema tongti süa tai tongloktsürtem nem anticipatory bail agütsüba atema khuret bena metetdaktsüogo. India senso kati Judiciary dang nungi teyari meshitsü atema temeten lir, saka okadaki public ola aser public dak sendakba onüktem asoshibo kanga arokaroka shisadanger ang telemtetba agitsüla. Joko state sorkari iba onük dak sendakba bushisüngdangba maparen tetsükdaktsü melii inyaka aotsü atema anticipatory bail anema ken o benoktsüla, ta NTC-isa ashi.
Tanü asen Naga nunger lokti nung amokmerenba, rara menaba, ozüng alema apuba amala inyakyimtem yimya ama dang kümogo, saka item inyakyim ya asen sobaliba nung khenyongi mali, ta NTC-isa metetdaktsü.
Zunheboto jila nung Chief Medical Officer (CMO) aser pa den inyakertemi ajungmesoa Naga Yimten telok kati ACAUT activist tem amokmerenba osang angashidang NTC-i tebilemtsü khuret abener. Naga Yimten telok aser State Govt. employee tem tsüngda tesentaktep aliba ajanga küm aika public funds tim mesüi amshia arur, ta parnokisa ashi.
NTC-isa ashiba agi, sorkar ketdangser aser mapa inyaker kati Naga Yimten telok tenüng nung mapa inyakba aser ACAUT activist tem amokmerenba kukua aitsür. Sorkar mapa inyaker kati kibur ana metenzüktsü atema ozüng lateta lir.
Sorkar ketdangser kati sorkari agütsüba nung tenük mesüngra, pa/lai mapa toktsütsü akok. Iba mesükba sorkar mapa inyakertem ozüng agi alenbangtsüla, ta NTC-isa takhangba agütsü.
Ano külen, Zeliang Peoples’ Organization (ZPO)-i Manipur nungi nisung ana- K. Rangsobe aser Lunghilang Pamai nem  Scheduled Certificate, Indigenous Inhabitant Certificate aser Backward Tribe Certificate agütsüba anema Commissioner, Nagaland tsüngdang ken o ka benoka lir, ta NTC sangdong nungsa shia lir.
Tenati Zeliang kin tenüng nung No. 15424 aser No. 15663 ajanga NPSC Exam 2016 agütsü. Iba ya ozüng alema inyakba mapa ka lir, kechiyong non-indigenous tribal candidate mesüra backward tribe nung non-member kati tashiyim amshia mapa angutsü makok. Anungji, bangdak ketdangsertemi iba inyakyim kanga junga bushisüngdangtsü aser ozüng tapet agi merenshitsü takhangba agütsür, ta NTC-isa shisem.