Lanurtemi yangluba ayoker

Tanep Dimapur nung Bodbar bazaar nung Dimapur Ao Baptist Arogo nung lanurtemi yangluba osettsüset aser chiyongtsü tapu balala ayoktsü ayongzükba sentong ya ajak asoshi tajangzük akaba sentong ka asütsü. Iba ama sentong yagi lanurtem nem pei dak aketba sempet amshia tangar nüngdak kar apiteta yanglua ayoktsü shisa tasen ka agütsür. Tanü alima nung akaba bazaar tulutibajia yamaji tenzük. Aiben asenoki asenoksasa asenokibo kecha meyanglutettsüla amato bilemer. Ibayongji asenoki yanglua ayoktsü melen tangar dang alia agitsü asoshi dang bilemer. Aji oda, shin o nung, ‘nisung kaji pai kechi koma bilemdir, iba amaji pa asütsü,” ta ashiba ama, asenokibo kecha meyanglutettsü ta bilemba agi kecha meyanglutetter. Ajisüaka, iba ama bilemba nungjisa melii asenokia tagitsü langka kabosa yanglutettsü ta bilemra yanglutettsü. Tanü lanurtemi jungjunga bilemdangtsüba mapa kaji soruchiokba ya asütsü. Joko kibong aika nung jala jabasotemi soruchioktsübajibo yutsür mi aputeta mashi, gas stove tsükloker süngo molua mejemtetba chirnurtem aika lir. Ibaji asenok kidang kilir ayuba sobaliba tenzükba ajanga lir. Joko, kidang kilir lirji asenok kiburtembo anepdanbg tesü saaktsü, soruchioka masütsü, süa mashitsü aser kiset shiruru ajak kiliri dang reprangtsü. Aji oda, mapa ajak kilir kilir nem inyakdaktsür asenok tv reprangli aser mobile phone amshili ta anogo süitemdaktsütsü. Iba jagi asenoki tv sentongbo ajak meteta lir  aser mobile-a kanga karaa amshitetter. Ajisüaka, asenok chirnurtembo parnok tarutsü anogotem nung koma lia aotsüar shisabolutsüka lir. Atangji, parnok tsürabur kidang nungi kibalembua aodangyongi kiyimki sütsütsü aser yangji nüngdak oset ajak arangoka toktsür kilir dena yoktsü. Ajisüaka, iba jagi kibong ketdangsüa moutettsü. Takdang nung mena yur tv repranga aser mobile amshia kilir – kilir dang tenyaa kibong ka bener moutettsü. Ibaji lanurtemibo rajema mangutsü saka tsüraburtemi danga rajema tanü lanurtem taküm parnok tarutsü anogotem asoshi renemtsütsübaji kanga tongtibang lir. Alima nung takartibasanger chir süaka kecha inyak mashi kazüa dang chiyonga aliba agi taküm aser kibong jangratema moutettsü aser rongsen agir magimatsüla amato rezüngtsüaka meperitsü. Aji oda, nisung ka asoshi kodanga agir magimatsüba rongsenjibo pei teka agi inyakba nungi aruba rongsenji dang asütsü. Ashiko, asenok tsüraburtem  mangsa asüba nungi ajungbena tula semer necktie mesüba agi pei nük agi pei teni alema mengui asüküma alitsüa akok, ajisüaka iba asükümji asen semchir tashi moii chirnurtem dak atemer aser atemtsü. Iba ama tamajungba tiai asenok chirnur aser semchirsemnurtem meidaktsütsü asoshi tanü tsüraburtemi pei kidang lanurtem nem mapa inyakdaktsütsüla. Aji oda, tang Dimapur aser tanga arogotem nung inyakba ama lanurtem ayongdena peii akokba osettsüset mesüra chiyongtsü yanglua ayoktsü lenmang lapoktsütsüla. Atangji, aiben asenoki lanurtem tashi aser sempettemji telok atema senotsü bushiba sentong asoshi dang amshir, iba jagi telokbo akar saka lanurtembo sensaka alir. Iba amaji mesüi tamasa lanur shiai pei akok inyakba mapa ajanga pei nüngdakbo peritsüsa lidaktsütsü nükjidong asütsüla. Aji oda, kodangsa arogo, yimten mesüra lokti senden lia chiyongtsüka südir, lanurtem nem sen agütsür soruchiokdaktsütsüa akok mesüra pei yanglutetba oset aser chiyongtsü ayoktsü asoshi tesem balala nung sentong balala ayongzüka litsütsü akok. Ano, tesem kar nungbo lanurtemi yimdong oktsütsüa akok aser kiyongeri parnok nem sen agütsütsü. Iba amaji kiyong shia nung tsürabur mesüra arogo aser lokti tentettemi yaritepa ku mejepdak ki yanglutsütsüa akok. Iba ama maparen nungi lanurtemi senotsü aika aatettsü. Telokibo teloki ajungshia inyaktsü saka telok akatsü nükjidong nung masü saka kija akatsü nükjidong nung inyaktsüla. Telok akabajibo kija aka masü saka kija akabajibo telok akaba den kasa asütsü.