International Day of the World’s Indigenous People amung

August 9,20 16 nü Kohima College nung International Day of the Indigenous Peoples sentong agidang Secretary General NPMHR, Neingulo Krome-i o jembiba angur.

Kohima, August 9 (TYO) : Mongulbarnü Kohima College nung “Protect our Rights, Our Lands!” omen nung ajemdaker ‘International Day of the World’s Indigenous Peoples’ sentong ayongzüka agi.
Iba sentong ya Naga Peoples’ Movement for Human Rights (MPMHR)-i Kohima College Alumni Association den yaritepa ayongzük aser Asia Indigenous Peoples Pact (AIPP)-ia teyari agüja nungit.
Sentong nung NPMHR Secretary General, Neingulo Krome-i okila jembidang, “tanü asenoki International Day of the World’s Indigenous Peoples amungdang, asen den tantsütambutem aser Naga Club nungi tenzüker tanü Naga Yimten teloktem nungi lenirtemi asen temeten, asen litsü kümzüka ayuba aser asen puti otsü nung kanga dang okrongba tensatem nunga parnok taküm bendanga agüja asen maitsü kümzüka ayuba bilemteter” ta ashi.
Yimten telemtetba ka ano magiteti lir saka parnoki mapa tajung inyaka yutsüba ajanga tanü asenok benjungteper, ta Neingulo Krome-isa ashi.
“Asenok Naga nungeri alima nung tanga lisopurtem den medemdangra, parnok aika dang nungi asenok jenjang tajungba nung alir. Tangalenbo lisopurtem indang ali tashiyim agi agir, saka Naga nungerbo tia taka, kechiyong asen litsü asen meyongsa lir aser asenoki dang magütsüdi ta lemtetra, shingaia bener motettsü” ta paisa ashi.
Naga Yimten Maparen nung India ozüng aser par Linük temzüngtem Naga nunger madak ozüng süa amshitsü magizüker. Ibaji Indian Constitution nung Article 371 A ajanga metentsür. Iba ya tangalen aliba lisopurtem den asenoki medemdangra, rongsen tulu ka ama lir. Anungji, iba nung ajemdaker India-i Naga Yimten Teloktem den Ceasefire tenangzüktep agiogo aser yimjung olemtep agiyonga arur.
Sentong nung Kohima College Alumni Association Vice President, Neilezo Tep-ia o jembidang, shisaliok ajanga dang asenok tashi itshitsü aser asen temeten, litsü aser ali rongsen atema raratettsü, ta ashi.
Alima senmangertem ama lisopurtemi alima kümzüka arur aser ali rongsen timi ketdangsüa arur, ta Naga Hoho Assembly Secretary, K. Elu Ndang-ia o jembidang ashi.
Meimchir aser alima tsüngda tesentaktepji lisopurtem ajanga lir aser lisopurtemi alimaji taküm moatsür ama züngshir, ta Ndang-isa shisem.
Sentong nung Manipur kübok Changlang District nungi Peace Activist, Marina Kenglang-ia o jembi aser idangji laisa Arunachal Pradesh nung IPs ajanga khuret bener arutsüba indang lemsatep.