Mongsenyimti nunger mezüng tamang yimsü agizüksang kürak yanglu semzükogo

Mokokchung, August 03 (TYO): Pioneers of Teenagers Club Mongsenyimti aser Korang Mepu telongjem ajanga Mongsenyimti nunger rongnung mezüngbuba tamang yimsü agizüksang asür tsürabur Tsükjemtemjen kürak yanglu yanglutsüba August 2 anepdang Rev. Dr. Mar. Atsongchanger Executive Secretary ABAM ajanga semzüktsüogo.
Tanü koba tsürabur kürak yanglu nokdaka lir nüburtemi ibaji angudang pa dak koba tanela liasü ibaji lepa arua shisadangba mapang ka südaktsütsüla ta sentong nung kürak yanglu semzüktsür-i jembidang ashi.Paisa asür tsürabur-i küm noklangka tejakdang tamang yimsü agizüktettsüsa aliba temulung ulubaji atamata masü ta ashi.Tsürabur-i tamang nung koda ochishia akang akanga amiter aru iba kürak yanglu nungi ajizüka pa ama tamang nunga kürakji alitsü merangtsüla ta sentepa alibapur paisa ayongzüka liasü.
Sentong nungsa O. Sashi Pastor Mongsenyimti Baptist Arogo-i jembidang kürak ya mashi nisung ka atemabo meyanglutsür aser Yisu maru tashi nokdakteta alitsüsa kürak yanglu nokdaka yutsüba atema ajaayanga inyaktsür dang pelar ta shisem.
Kürak yanglu ratet Mrs. Imtisenla Jamir mezüngbuba General secretary Pioneers of teenagers Club Mongsenyimti-i jembidang tesüiba 1976 küm parnok nisung ishika tainlonglong mapang `teenagers club` ta jateter sayasapong aser lokti balala nung shilem agia aruba sülen jila balala nung senshia ali. Parnok telok jila balala nung lia arur Tsüngremer maongka ajanga Mongsenyimti nung 2008 küm AKM Mungdang alidang parnok ajurutepa yimer centenary amongtsü tenüng nung mapa tajung ka inyaktsü lemtet.Iba sülen par teloki rongsen bententeper kiyongertem nungia temulungertemi tenla agüja iba kürak yanglu asangsang nung takok ngua yangertetogo ta ashi.
Iba sentong R. Süpong Ozüküm President Korangmepu Telongjem-i ania agiba den tajungshi O Wb. Imnakümzük Chairman Mongsenyimti Village Council ajanga jembi aser Imti Pastor Mongsenyimti compound ajanga moaja sarasadema tembang.
Iba kürak yanglu ya Mongsenyimti nunger Mokokchung jila nung alir Sp. Wabang Ozüküm ajanga yangluba lir.Tesüiba küm paisa Chungtia yim nung par yimer Rev. Chujang kürak yanglutsüba den tang yagi tanabuba yanglur asütsü.Iba ama long ajanga nisung ka kürak yangluba ya Ao lima nung dang masü Nagaland nunga mezüngbuba lir. Sp. Wabang Ozüküm-isa North east zone Young Artist Award (2008-2009) küm agizük,2007 küm Nagaland Young Artist Camp, Pune, Maharashtra nung Nagaland state meyonga oa aden aser paisa tongtipang mapa tajung aika inyakba tesem aika nung lir.