South Sudan nung UN mitkartem ayutsü memulunger: Makuei

Juba, August 11 (Agencies): United Nations Security Council (UNSC)-i South Sudan yimtiba, Juba densema, lendong atalokba tongti tesemtem nung tensa azüoktsü asoshi UN mitkartem yutsütsü atema benokba onük magizüktsü lemtetba osang ka S Sudan sorkari metetdaktsüogo.
“Ozü linük nung UN mitkartem yutsütsü mapatongji United Nations Mission in South Sudan (UNMISS) tenteti ketdang asütsü renemra, iba mapatong asangsang nung inyaktsü memulunger kechiyong yamaji inyakbaji ozü S Sudan indang peisasa pei madak yimsü asütsü temeten anema inyaker asütsü,” ta S Sudan Information Minister, Michael Makuei-i metetdaktsü.
US sorkari mezüng benokba sülen S Sudan nung UN mitkartem yuja parnoki S Sudan mitkartem den yaritepa tensa azüoktsü onükji UNSC-i agizüka kasaji mapa küma inyaktsü telemtetba agitsü asoshi renemshiba osang angazükogo.
Ano, S Sudan nung UN regional protection force yutsütsü onük benoka jembitsü asoshi Intergovernmental Authority on Development (IGAD) lenirtemia Ethiopia  yimtiba,  Addis Ababa nung senden amenba osang jangjaogo.
Ano külen, S Sudan nung tensa azüoktsü asoshi UNMISS nem tashi agütsüba mapang atsünglangshitsütsü asoshi UNSC-i US kübok New York yimti nung taoba hopta senden amenba osanga angazükogo.