Philippines: Ozüng alema inyaker ta temulung malemer nisung 525 shi tepsetogo

Philippines police-i aibelenba kuli tejangja mongui aibelener ta temulung malemer nisungtem tepsetba anema longkak aitba sentong ka Manila yimtiba anüdoklentip tsütsü, Quezon yimti nung tentetba Philippines University nung Philippines kaketshirtemi agiba noksa nung angur. (Quezon city, August 11)

Manila, August 11 (Agencies): Philippines Tir, Rodrigo Duterte-i aniba Philippines sorkari ozüng alema mozü mora shibelener ta temulung melemi bilema tepsetba nisungtem ita 1 dak tema nung nisung 500 dak tema akümba osang jangjaogo.
“Taoba July ita 1 nü nungi tenzüka, ita 1 dak tema nung police-i ozüng alema mozü mora shibelener ta temulung melemi bilemer nisung 525 shi mapang balala nung tepsetba aser nisung 7,600 shi pua ayuba osang jangjaogo. Ano, temulung melemi bilemer nisung million tesadang ka shi peisasa police nem bendanga agütsüogo,” ta Philippines national police kübok tentetba Investigation & Detective Management Direcotorate-i osang jangjashitsüogo.
Philippines miktar lenisang menden abendang tashiyim agi linük yimsüsütsü tashi agiba sülen yaküm May ita 9 nü agiba Tir election nung takok ngua, Tir tasenba akümba sülen Duterte-i par linük nung ozüng alema mozü mora shibelenshir anema kanga sashia raratsü tenzüka lir.
“Onok den tongpang nung amshitsü prangpong bener rarar ozüng alema mozü mora shibelenshirtem kasettsüsa aküm,” ta police-ia metetdaktsüogo saka parnoki taküm magi ozüng alema inyaker ta temulung melemi bilemba nisungtemji taküm putettsüsa jenjang aiben ajurur ta shia, nübur temeten asoshi nokdakertemi police aser parnok inyakyim aitsütsü tenzüka lir.
Supreme Court-i tan tenzüka aliba ozüng alema mozü mora shibelenshir anema raraba mapatong nokdangtsü merangra, Philippines nung mitkar ozüng benoktsü amokmerenba olen ka Duterte-ia metetdakja lir aser nübur temeten atema nokdakertemi amokmerenba aser kuli tejangja mongui nisung tepsetba maparen anema longkak aitsü tenzükogo.
“Aibelener nisung ta temulung melemi bilemba nisungtem injang agi kasetadokra, parnok aibelena  mesüra metena aliba kuli kodanga mongutettsü,” ta shia, left-wing nübur temeten asoshi nokdakba telok lenisang, Vencer Crisostomo-i aitsüba olen ka metetdaktsü.
Ano külen, Philippines Senate-i tentetba Justice & Human Rights ludeni kuli tejangja mongui aibelener ta bilemba nisungtem tepsetba bushisüngdangtsü renemba osang ka Senator Leila de Lima-ia metetdaktsüogo.