Tennis: Nadal o Lopez nati tebur doubles gold agizükogo

Rio de Janeiro, August 13 (Agencies): Spain nunger Rafael Nadal aser Marc Lopez nati final asaya koka, tang tasayadak Rio Olympics kübok tebur tennis doubles takok marok yashi, Hokolbar nü agizükogo.
Nadal o Lopez nati yashi points 6-2 3-6 6-4 agi Romania’er doubles asayar, Florin Mergea o Horia Tecau na tsükdakja final asayaji akok.
Tan doubles gold agizükba ya Spain linüki tan asayamong nung tasembuba gold medal agizüker lir.
Ano külen, America nunger Steve Johnson o Jack Sock nati points 6-2 6-4 agi Canada nunger Daniel Nestor o Vasek Pospisil na madak takok ngua, bronze medal agizüka liasü.
Tan doubles akokba sülen Nadal-i maneni singles tetoktepba nunga gold agizüka, tan asayamong nung tennis tetoktepba gold medal 2 tashi agizüktsüsa jenjang ngua lir.
Nadal-i par singles semifinal asaya Argentina nunger Juan Martin de Potro den asayatsü lemzüka lir.