Joseph Schooling-i Phelps madak takok ngua otsü yanglur

Rio de Janeiro, August 13 (Agencies): Singapore nunger tsüwar, Joseph Schooling-i America nunger tzüwar mongin, Michael Phelps madak takok ngua, tebur 100m butterfly tetoktepba gold medal yashi, Hokolbar nü agizüka otsü yangluogo.
Tan takok anguba ajanga arishi küm 21 tain, Schooling-i Phelps-i tan asayamong nung gold medal 5 buba aser ajak agi gold medal 23 buba agizüktsüren nokdanger lir.
Asian champion, Schooling-i second 50.39 nung alizüng mezüng tonga gold agizükba sülen tan Olympics nung  par Singapore linük asoshi gold agizüker mezüngbuba asayar aküm.
Schooling sülen anidaka, Phelps, South Africa nunger Chad le Clos aser Hungary nunger Laszlo Cseh nungeri second 51.14 nung alizüng tonga silver medal agizüka liasü.
Ano külen, tan Olympics tembanga shilem agiba sülen tzüwatsü tetoktepbatem nung joko shilem magitsü lemtetba olen ka Phelps-ia yashi metetdaktsüogo.
“Ni tan Olympics sülenbo tzüwatsü tetoktepbatem nung joko shilem magitsü lemtetogo. Külem asayartemi taruba küm 4 tashi maneni tokteptsü asoshi ni ajungshiogo saka ni joko metokteptsü tatem küma lemtetogo,” ta pai ashi.
“Ni küm 24 tashi takok jenti ngua toktepogo aser iba jagi ni temulung asür,” ta pai shisem.
Taoba mapang, 2012 küm tetoktepba nungi anentsü lemtetba osang sangoktsür tanaben Olympics nung shilem agitsü lemtetshisang, Phelps-i tan Olympics nung gold medal 4 tashi agizüka lir.