3 buba Test asaya: De Silva-i par Sri Lanka asoshi century yanglu

Colombo, August 13 (Agencies): Dhananjaya de Silva-i century yanglua par Sri Lanka telok jenjang tajungba kümdaktsütsü meranga Australia den tang tasayadak tasembuba aser tatembangba test asaya nung tanü, Honibar nü shilem agiogo.
Asaya 3 densemba test series nung points 2-0 agi temaba jenjang ngua alir, Sri Lanka teloki tatembangba asaya nung mezüng batting asütsü lemtet saka wicket 5 lao tashi nung par teloki runs 26 dang yanglua liasü.
Iba sülen De Silva aser Dinesh Chandimal nati aroki lungjemer runs 188 tashi yanglua kangasa junga asayaba yong tanü asaya tembang tashi nung par Sri Lanka teloki wicket 5 laoa ajak agi runs 214 tashi yanglutettsüsa jenjang tajung angu.
Tanü asaya nung De Silva-i runs 116 aser Chandimal-i runs 64 yangluba sülena Australia bowler-temi tena asayadak nungi temaleni metugudaktsüteti asayaji tembang.
Left-arm paceman, Mitchell Starc-ia tanü asaya nung Sri Lanka wicket 3 tashi agia par Australia telok tenüng nung kanga junga asayaba sülen tan series nung ajak agi wicket 20 agir asayar kümogo.