J&K kaketshirtemi shisaliok nung ang rangloktsüla: Nabi Azad

Bengaluru, August 14 (Agencies): Tanü Congress lenir aser Rajya Sabha nung Opposition lenir, Ghulam Nabi Azad-i Jammu & Kashmir nung kaketshirtem dang yimtenren nung majemoktsüla saka shisaliok nung temelung agütsütsüla, ta ashi.
“Item teburtem ajak, Kashmiri Pandits mesüra Muslim teburtem mesüra Jammu nungi teburtemji yagi shisaliok atema aru. Anungji ni parnok dang, pei state adener oa alidang junga alitsü mepishir,” ta Azad-i ashi.
Bengaluru nung osangbenertem den jembidang Azad-i, “Tazüngba tamasa tembanga azüngtsüla, ibaji parnok atema tongtibangtiba asütsüla,” ta ashi.
Jammu & Kashmir tensaji shisliok atema tetemsü masü ta shia Azad-i, “Yangi azünger asen chirtem dang, parnok koba tamangba yimsü nungi südir süaka parnoki pei tazüngba tama renema azüngtsü mepishir,” ta ashi.
“Politics ajanga Kashmir raksaogo, iba ya ajanga kaketshirtemi pei tai meraksatsüla,” ta paisa ashi.
Yashi o lemtep sentong ka nung Kashmiri pandit lenir kati Indian army tenüng sanga jembiba ajanga Kashmir nüjiso pusemer lanurtem aser kaketshirtemi pa anema sashia nokdaka liasü. Bengaluru nung aliba United Theological College nung Amnesty International India-i ayongzükba sentong nung Kashmir Independence yimyim ayima liasü, aser ibaji ajanga iba sentong tepor mejungi tembang.
Azad-isa, “Kashmir nung raraba tebilemtsü onükji Jammu Kashmir nüburtem atema dang masü saka linük ajunga atema tebilemtsü onük ka lir, ibayongji onoki iba onük ya Parliament nunga jembi,” ta ashi.
Ano külen tanü Akhil Bharatiya Vidyarthi Parishad züngsemtemi United Theological College kima adenshia yashi ayonga akaba sentongji linük anema lir ta longkak aita sentong ayongertem aser yimyim ayimertem nem temerenshi agütsütsüla ta takhangba agütsü.
Parnokisa, tang nungibo Amnesty International-i ayongba sentong akatsü atema temelaba magütsütsüla, ta takhangba ka agütsü.