Dalits anema inyakertem nem temerenshi tulu agütsütsü: Tir

New Delhi, August 14 (Agencies): Linük nung Dalit nunger aser nübo agi tangar memenepi alirtem anema inyakba dak sentakba nung Deobarnü Tir, Pranab Mukherjee-i, item tatalokba nung aibelenertem nem temerenshi tulu agütsütsü, ta metetdaktsü.
Linük nung akhümtsübutep aser taremzüktep makai inyakertem anema Mukherjee-i yimtenren nung telemsa adoktsüsa inyakba den külemi nija aser loktitemi telemsa adokdaktsüba atema tekümdangtsü o ashi.
India’er 70buba Independence Day atongtsü anogo ka jakdang Tiri, ketdangsertem aser linük nung tashi aliba rejutem dang akhümket yua akhidang nungi India nung amenteta aliba pei teinyaktsü shilem inyaktsüla, ta ashi.
“Küm pezü nung ni telemsa adokdaktsübatem aser akhümtsübutep maliba tatalokbatem nguogo. Lokti nung tashi malirtem anema inyakbaji asen linük yimya tajungtem anema lir, aser itemji ozüng takhang agi alentsü nüngdak,” ta Mukherjee-isa ashi.
Tirisa, asen lokti nung arok shisatsü ajanga item tentet tamajungji agientsü aser India ainba otsü nung tetsükdaktsü malitsü, ta ashi.
Mukherjee-i, linük Temzüng nung linük kübok telen shia teinyaktsü aser khurettem indang shia lir, ta ashi.
“India songjen ain nungang India aintsü,” ta Tirisa shi.
“Terenlok mengui sendoka alirtem dendaktsütsüla. Temulung yirua alirtem aser sendoka alirtemji anir arutsüla,” ta paisa ashi.