I Love Mokokchung Facebook Group-i ‘Touch Jorhat’ teyari agütsü

August 14, 2016 nü Jorhat DC indang official residence kima nung Jorhat deputy commissioner, Virendra Mitral (Ao sübotsü sobur aliba)-i tzümetsüng atema relief fund agizükba mapang agiba noksa angur.

Jorhat, August 14 (TYO) : I Love Mokokchung Facebook Group-i Assam kübok Jorhat district nung tzümetsüng ajanga takoksa angurtem yaritsü nükjidong nung ‘Touch Jorhat’ project tenzüka mapa inyak aser tanü parnoki Jorhat Deputy Commissioner den ajurutepa timtemertem yaritsü indang sen agütsü.
Tanü Border Peace Coordination committee züngsem, Er. Temsu Wathy, ward commissioner (Jorhat) Jayanta Baruah aser Assam nung media nisungtem lia ‘Touch Jorhat’ project indang sen agütsü.
July 16, 2016 nü MMC Shopping cum Parking Complex nung Touch Jorhat Project ta ser angati kenten sentong ka ayongzüka agi. Iba sentong nung kentener aser telok 30 dak temai angati shilem agi aser iba asoshi nisungtemi sen 1,12000 tenla agütsü.
Touch Jorhat atema senosangertem, local union tem aser telok balalai nübo, sen aser shisatsü agi nungita yaritepa liasü.
Tanü Jorhat DC Virendra Mitral-i ILM Facebook Group aser Mokokchung nung alirtem dang kanga pelaba metetdaktsü.
ILM group-i Jorhat DC dang timtemer yaritsü atema sen agütsübaji pa ketdangsüba nung amshitsü ashi aser Jorhat nung tzümetsüng ajanga takoksa ajururtem yariba nung ochishia amshitsü mepishia metetdaktsü.