Daniel Craig-i maneni James Bond film nung shilem agitsü

London, August 15 (Agencies): Actor Daniel Craig-i television drama ‘Purity’ nung shilem agitsü aser pai joko 007 James Bond film nung shilem magitsü ta olulu prokba ajanga ‘Bond’ sapurtem aika jashia liasü.
Ajisüaka US Network Showtime CEO, David Nevins-i, Craig-i ‘Purity’ nung shilem agiba ajanga taruba Bond film nung shilem agitsü atema tetsükdaktsü malitsü, ta ashiba osang the Independent ajanga metetdaktsü.
Paisa, “Purity ji shilem tulubaka 2017 küm tembangtsü, aser ibaji taruba Bond film atema parnoki kobika ataba sülen tangoktsü, iba dakji dang keta lir. Kar nungbo ‘break’ alitsü saka production jibo maneni alitsü,” ta ashi.
Tamalen arishi küm 41 Daniel Craig-i ‘007’ film pezü nung shilem agia lir aser item rongnung tesüsabuba film ji ‘Spectre’ lir.
Pai shilem agiba television series ‘Purity’ ya Jonathan Franzen indang novel nung ajemdaker yanglu aser iba otsü ya aiür ka North Carolina nung intetba otsü lir.