Nüjisoji kar atema dang masü, ajak atema asütsüla: Rahul

New Delhi, August 15 (Agencies): Tawa linük nung Dalit nunger anema inyakba kanga bulua atalokba dak sentakba nung tanü Congress tatong Tir, Rahul Gandhi-i, nüjisoji kar atema dang masütsüla ta shia pai sensotem dang tesempa prokba tentettem tamakok ngudakja linük yangertsüla, ta ashi.
Hombarnü Party headquarters nung Independence Day sentong nung jembidang Rahul-i, “Tawa tamajung tentet kari asenok rongnung kar anema temeten agientsü amokmerendang asenoki, nüjisoji kar atema dang masü, saka ajak atema lir ta bilemtettsüla. India nung aliba nisung ajak temeten lir aser sadoksadoka lia pei tebilemba jembitsü temeten lir,” ta ashi.
Gandhi-isa, nisung shinga metsübui aliba linük ka akumtsü atema India nungeri inyaktsüla. Ochi atema asenoki nokdaktsüla aser inyaktsüla,” ta ashi.
Party headquarters nung tang mezüng Rahul-i linük wako ajungketa liasü.
Taoba mapangtem nungbo party office nung Congress Tir, Sonia Gandhi-i linük wako ajungketa liasü. La yashi nija hospital ka nungi aluogo.