India akhümket atema ano teinyaktsü jenti lir: L K Advani

New Delhi, August 15 (Agencies): 70buba Independence Day anogomung nung BJP lenir tain, L K Advani-i, nujiso ngur alibaji teperi masü, kechiyong alima tsüngdang India akhümket atema teinyaktsü mapa jenti lir, ta ashi.
Paisa, India-i kiralongraba anema raraba nung takok angutsü imlar, ta ashi.
Taoba mapang Deputy Ato kilonser, LK Advani-i, “India linüki 70buba Independence day amungba atema ni kanga pelar. Tanü Red Fort nung Independence Day benjungmung nung ni-a linük sensotem den denogo. Ajisüaka nüjiso ngur aliba India nung ano teinyaktsü aika lir aser India-i alima tsüngdang akhümket atema inyaktsüla,” ta ashi.
Par kima linük wako salaba sülen Advani-i, “Independence kijaji India nunger atema teperi masü, ajisüaka teinyaktsü tongtibang kaji nüjiso agi peisasa yimsüsüba akumtsüla. Tanü linük ajaki iba atema inyaker aser India ji pei sasa yimsüsüba aser tajungtiba yimsüsüba linük ka kuma India tenüng ajungkettsü ta ni imlar,” ta ashi.
Pakistan occupied Kashmir (PoK) aser Gilgit nung tatalokbatem indang asüngdangba langzüdang BJP leniri, “Tawa alima linüktem atema timtem tulutibaji kiralongraba lir. Iba ya India-i koktettsü ta ni amanger. Asenoki iba timtem anema rarar aser asenoki iba madak takok angutsü ni imlar,” ta ashi.