NC aser Congress-i Independence Day sentong nung maden

Srinagar, August 15 (Agencies): Kashmir Valley nung rara adoka tensa mesüngjemteti aliba nung ajemdaker Jammu & Kashmir nung Opposition party ana- National Conference aser Congress-i Srinagar nung aliba Bakhshi stadium nung Independence Day benjungmung sentong nung maden.
Osangbenertem den jembidang National Conference general secretary, Ali Mohammad Sagar-i, “Onoki item sentong nung madentsü lemtet, kechiyong Kashmir nüburtem joko ita ka dak tali curfew ozüng kübok lir aser tang tashi Kashmir Valley nung tensa temelenshiba mali,” ta metetdaktsü.
Paisa, Union Home Minister Rajnath Singh-i Valley semdangba mapang parnoki pa nem temepishiba ka agütsü, ajisüaka pai National Conference dang nangzükba ama meinyak, ta ashi.
“Onoki injang tila amshiba anentsü aser tensa tajungba akümtsü atema mera kar benok.  Home Minister-i item atema nangzük, saka iba amaji matalok,” ta Sagar-i ashi.
Ano Congress otongdar kati, yimti nung curfew ozüng tesashi aliba ajanga party lenir shinga Bakhshi stadium-i mao, ta ashi.
Paisa, ajisüaka party-i Lal Chowk nung aliba Maulana Azad road anasa headquarters nung sentong ka ayonga linük wako ajungketa Independence Day among, ta ashi.
Taküm July 8 nü Kashmir nung sepaitemi Hizbul Mujahideen commander, Burhan Wani kahsetba sülen July 9 nü nungi Kashmiri nungeri longkak aita sepaitem den raradang police ana densema tang tashi nung nisung 56 süogo aser nisung merirjang aika yiruogo.
Ano Srinagar nungisa tanga osang ka nung, tanü Srinagar nung aliba Bakhshi stadium nung Independence Day tongti sentong nung Jammu & Kashmir chief minister, Mehbooba Mufti-i linük wako saladang wakoji ali nung tsüka liasü.
Tang mezüng chief minister, Mehbooba-i linük wako saladang ali nung tsükba sülen security sepai anati wakoji aama lia lai salem agütsü. La sabang nungi aluba sülenang security staff temi aritepa wakoji ajungketa liasü.
Tesülen osangbenertem den jembidang Director General of Police, K Rajendra Kumar-i, iba tatalokba bushisüngdangtsü atema tuyuogo, ta metetdaktsü.
Kumar-i, “Iba ya kar tai ajanga lir, aser iba nisungba jagi telangzüba agütsütsü nüngdak. Kodaser wako ka yamaji tsüktsü,” ta ashi.