Chiyungtsü nung sen atuba azüoktsü: Modi

New Delhi, August 15 (Agencies): Tanü Ato kilonser, Narendra Modi-i chiyungtsütem nung jenjang atuba azüoka sensakertem chiyungtsü jenjang tasak masütsü atema inyaktsü, ta nangzükogo.
Tanü Red Fort nung Independence Day anogomung onük jembidang Modi-i, par sorkari jenjang atuba rate shilem 6 dak tema akumtsü memela, ta metetdaktsü.
Ato kilonseri, “Taoba sorkar mapang (UPA) jenjang atuba rate shilem 10 adena atu. Onoki maneni mera agiba ajanga  shilem 6 dak tema atutsü onoki memela,” ta pai ashi.
“Onoki Reserve Bank den tezüngzüktep agia RBI-i shilem 4 tashi, plus-minus shilem 2 jenjang atuba azüoktsü atema mera agitsü jembiogo,” ta paisa ashi.
Yaküm February ita nung sorkari RBI den tezüngzüktep ka agia taruba küm pongu atema jenjang atuba shilem 4 dang asutsü, aser temaba tashi nung shilem 6 aser tajembaji shilem 2 asütsü lemteta liasü.
Taküm July ita CPI inflation shilem 6.07 tashi tua liasü, aser ibaji tesüiba küm ana tsüngda timtiba liasü, ajisüaka tang tasenba Goods & Services Tax (GST) benokba ajanga ano timba akumtsüa akok.
Modi-isa, küm ana atonga linük nung tzünglu ajema aruba ajanga aonsotsü nung jenjang atutsüsa akum, ta metetdaktsü.
“Jenjang atuba azüoktsü atema onoki kanga meranga inyakogo. Sensakertem chiyungtsü jenjang masaktsü atema ni inyaktsü,” ta paisa ashi.
Dal densema menjang nung jenjang kanga atuba dak sentakba nung Modi-i, takümbo  menjang 1.5 agi timba tsünüogo, aser tzünglu junga aruba den Minimum Support Price aser aluyimertem nem bonus agütsüba ajanga tajungba akumtsü imlar, ta ashi.
Takümbo tzünglu junga aruogo, ajisüaka tzünglu kanga tali aruba ajanga state kar nungbo timtem ajuruogo, anungji sorkari item state tem nem teyari agütsütsü, ta Ato kilonserisa metetdaktsü.