S Korea kümzüka ayutsü asoshi bendanga agüja inyaktsü nangzüker: Park

Seoul, August 15 (Agencies): South Korea linük kümzüka ayutsü asoshi bendanga agüja inyaktsü tenangzükba olen ka S Korea Tir, Park Geun-hye-i tanü, Hombar nü metetdaktsüogo.
Terminal High-Altitude Area Defense (THAAD) ta ajaba missile system lar linük anemoktsü lemtetba atema metentsüba olen ka lemsaptepba den külemi, North Korea nung meimchir temeten anema inyakba reprangshia kasaji nokdangtsü bilemba olen ka lai tanü sangoktsü.
World War II tatembanglen Korean peninsula nüchiso ngur küm 71 abensaba bilemteta amongba sentong nung onük jembidang, Park-i tanü iba olenji metetdaktsü.
“Asen linük lungbanga alir tashi tulu abener linüktem den tesendaktep tajung ayuba ajanga asen linük jenjang junga alitsü tangatetba agientsü nungdaka kümogo,” ta shia, par linük kümzüka ayutsü inyakyim nung bendang linüktem nem teka mamokdaktsütsü lemtetba osang lai sangoksü.
“US den aroki lungjemer THAAD system asen linük amenokba ajanga asen linük kümzüktsü maparen nung tongti shilem agitsü. Asen linük kümzüka ayutsü atema lenmang tanga lira, kasaji benoktsü ajungshir,” ta lai S Korea  nung THAAD system amenoktsü lemtetba metenja ashi.
“N Korea-i par nuclear mapatong anentsü menangzük tashi par linüki rongsenren jenjang tamajung ajuruba den külemi, alima linüktemia par linük den kodanga mesendakteptsü,” ta lai metetdaktsü.
Pyongyang-i UN telemtetba anema inyaka, par tongpang nung amshitsü nuclear oset 4 buba taküm 2016 küm January ita tendangba sülen Korea linük ana tsüngda tesendaktep taoba mapang nungi tang tamajungba akümba osang bushiteta lir.
“Pyongyang lenirtemi telemtetba tamajung agiba ajanga par nüburtemi ajurushiba timtem toushi aser sorkari nübur temeten anema inyakba mangur ama metoktsütsü,” ta Park-i shisem.
Pyongyang-i tashiyim agi tai maketba nisungtem pua ayuba, parnok rishikangshiba aser abilenba kuli mebushiteti tepsetba densema, par nübur temeten anema kanga sashia inyakba osang ka United Nations Commission of Inquiry-i 2014 bushiteta alima dang sangoktsüogo.
N Korea sorkar aser par linük lenirtemi nübur anema inyakba kuli bendentsü aser teyari agütsüba mapatong ajungai Pyongyang nung alir nübur temeten jenjang tajungba kümdaktsütsü telemtetba ka Seoul sorkari taküm March ita agiba osanga jangjaogo.