Aoyimsen nung Tsüngremmong longsua mongogo

Aoyimsen (Dimapur), August 03, 2015: Hombar nikongdang Aoyimsen, Dimapur  nung Tsüngremong benjung amongba mapang tongti tesemdanger Art & Culture Parliamentary Secretary, E Eshak Konyak Aoyimsen Women Culture Club züngsemtem den külemi tsüngsangba noksa nung angur.

Dimapur, August 03 (TYO): Hombar nü Aoyimsen Panchayat cum Multi utility complex nung Aoyimsen Lanur Telongjem-i ayongzüka ‘Peace, harmony & unity’ omen nung ajemdaker Tsungremmong benjungmong den saisapong sentong longsua kaogo; iba sentong nung tongti tesemdangerji Art & Culture Parliamentary Secretary, E Eshak Konyak liasü.
Tongti tesemdanger o jembidang Eshak-i, “Benjung mapang ya tenüngsang agütsüba aser pelatepba mapang ka dang masü, saka iba ya ajanga nübur tsüngda telongjem, temeim aser tangatettep kadaktsür,” ta ashi.
Paisa, telongjem medenibo nükjidong metongtettsü, anungji asen lokti ajungtsü atema ajak lungjemer khuret süa inyaktsüla, ta ayongzük.
Yimjung lira nisung kati tesem mashi ka nung tesünep nung litettsü, anungji Aoyimsen nüburtem aser arrtsülen aliba nüburtemi kidanger state den yimjung aser tesünep nung alitsüla, ta Parliamentary Secretary-isa ayongzük.
Tanü iba sentong nung Aoyimsen Lanur Culture Club, Aoyimsen Village Council, Aoyimsen Lanur Telongjem, Aoyimsen Women Culture Club aser Marok Cultural Club ajanga sobaliba yar-tsüngsang balala ajanga shilem agiba agi lokti kanga jangratemdaktsüogo.
Iba sentong nungsa Apokla Lkr-i sangro azüng, Aoyimsen Lanur Telongjem Tir, Temsu Ao-i lokti pela agizük, Aoyimsen Village Council Mendenbuba, Dr.Senti Jamir-i anküp tepela o jembi aser Karbi Anglong Ao Association Tir, Bendangwati-i tajungshi o jembia liasü.
Aoyimsen Baptist Arogo Sannüker, Rev. I Nochet-i sarasadema iba sentong tenzük aser Arogo Youth Director, Moa Lcr-i sarasadema sentong tembanga liasü.