Selena Gomez den mangatettep adoker Justin Bieber-i Instagram account shibang

Los Angeles, August 16 (Agencies): Justin Bieber-i social media nung pa taoba tetong Selena Gomez den mangatettep adoka aliba mapang ka nung pa indang Instagram account shibangogo.
Hombar aonung nungi Bieber indang sapurtemi pa indang page melapokteter, ta aceshowbiz.com ajanga metetdaktsü.
Taoba hopta Justin Bieber-i pa tetong tasen Sofia Richie tena agiba noksa kar sayuba sülen iba mangatettep adok.
Instragram nung Justin aser Sofia na indang noksatem sayuba atema Justin sapur kari pa aser tetong na lutsü tenzük.
Iba asoshi Justin-i o kar meyiptsü aser idangji pa taoba tetong Selena-ia, “Nai ibaji magizüktetra nütong indang noksatem tesayu. Nüna tsüngda ibaji khenyongi balaka ama yuang, saka na sapurtem dang tejashi. Parnoki na meimer” ta metetdaktsü.
Ajisüaka, Justin-i Selena aija zülu aser la nüngtugu akümtsü atema pa amshi ta tai tongloktsü.
Arishi küm 22 tain Bieber-i mezüng pa indang Instagram account ji nija aküm aser iba sülen public kümdaktsü. Ajisüaka, tatem nung pai account khenyongi shibang.
“Nai nü account nija akümba mapang nungi na sapurtem aika samaogo” ta Instagram nung Bieber sülen anidaker kati ashi. Ano tangar kati “Aser tang onoki na toktsür” ta metetdaktsü.
“Kechiba pa indang Instragram delete asü. Nai ‘comments’ dang shibang nunga ajungtsüba asü Justin Bieber” ta nisung kati Twitter nung metetdaktsü.