Acharya-i Lokayukta aser 33% women reservation mapa küma inyaktsü ayongzüker

Kohima, August 16 (TYO): Nagaland Angh, P B Acharya-i state sorkar dang Urban local Bodies (ULB) nung tetsür nem shilem 33% lemzüktsüba aser Lokayukta mapa küma inyaktsü mepishia metetdaktsü.
“Ochimashi sorkar ketdangsertem azüoktsü aser sorkar mapa tashishitsü melii inyaktettsü atema ni Chief Minister, T R Zeliang dang Lokayukta tentettsü shiogo,” ta Mongulbar nikongtsütsü Raj Bhavan nung PB Acharya-i osangbener den sensaksemdang ashi.
“Democratic sorkar kati nübortem nem telangzüba agütsütsüla aser civil society aikati hopta ana tsüngda Nagaland nung akhi ama ozüng bener arutsü aser ochimashi anema inyakba telok ka tentettsü takhangba agütsüogo,” ta paisa shisem.
Tawa State Cabinet-i tetsür nem 33% lemzükja Urban Local Bodies (ULB) election agitsü telemtetba agiba atema jembidang, Nagaland Angh-i ashiba agi, tetsür nem shilem lemzüktsütsü atema ozüng lateta lir aser state sorkari Nagaland Municipal Act yanglushiogo.
“Urban Local Bodies (ULB) nung tetsür nem noklang nung shilem 33 lemzükjang ta Naga tsürtemi Supreme Court nung ken o benok aser ibaji atema oshidang ka magütsü lir. Iba dak sendakba nung State sorkari tetsür nem shilem lemzüktsütsü atema telemtetba agiogo saka kin telok kari ibaji magizüker. Anungji, state sorkari iba onük angatetteptsüla aser tetsür nem shilem lemzüktsür ULBs indang election agitsüla,” ta paisa metetdaktsü.
Indo-Naga yimjung olemtep indang jembidang PB Acharya-i, “kobi melii langka tajung ka adoktsü” ta ashi saka pai mapangbo memetetdaktsü.
Centre atema interlocutor R N Ravi aser NSCN(IM) general secretary Th. Muivah nati ashiba ama Angh-ia olemtep tajung kadar aser telemtetba ka agitsü ana nung lir ta ashi.
PB Acharya-isa, mangatettep malitsü aser yimjung ngua state tejakleni aotsü atema Naga telungpur telok ajak dang yimjung olemtep nung adentsü atema mepishia metetdaktsü.
Nagaland nung law & order dak sendakba onük jembidang, nübortemi mulung lemtettsüsa state sorkari mapa inyaktsüla, ta PB Avharya-i ashi.
March 5, 2015 nü telok kati tetsür tashiyim agi raksatsüba atema tai tonglokja alir ka tepsetba aser ano Dimapur district nung tetsür shishilembar ka tepsetba indang bushisüngdangba osang sorkari yimjak nung memetetdaktsüi lir, ta Angh-isa ashi.
Item ken o tembanga bushisüngdanger aibelenertem merenshitsü atema enquiry commission tasen shimtsü atema paisa state sorkar dang mepishitsü bilemer ta ashi saka Wuzu nung tanur ka kahsetba indang bushisüngdangba osang metetdaktsüba atemabo pai kecha mashi.
Terenlok mapa dak sendakba onük jembidang, Kohima nung Medical College aser Railway amala tongtipang mapatong ali kibur ken o ajanga meinyakteti anendaka lir, ta Nagaland Angh-isa ashi.
Nagaland nung educational system atema süoki ia bilema ashidang, Mumbai nungi pharmaceutical telok tulu Wockhardt Foundation ajanga Nagaland kübok arrtsülen aliba tesemtem nung terenlok mapa inyaktsü mulunga lir. Nagaland nung school 52 rongnungi Wockhardt Foundation-i school 28 shimetogo, ta Acharya-i metetdaktsü.
Nagaland nung primary school züngsema government school 1600 dak tema lir saka High aser Higher Secondary jenjang nung takok junga mangu. Takok angur noklang nung shilem 95% tashi nija school tem nungi lir, ta paisa shisem.
Naga loktiliba nung nendaka inyakba aser mapa inyakba yimya samaa odar. Nübortemi loktiliba tashi itdaktsütsü atema mapa inyaktsü mulungtsüla. Nagaland nung aliba ali rongsen ajangzüka amshitsüla aser iba asoshi Naga nunger lanurtem skill renlokdaktsütsüla, ta Angh-isa metetdakts.