SW Department nung mapa 40 ‘backdoor’ ajanga shimok: ACAUT Nagaland

Dimapur, August 3 (TYO) : ACAUT Nagaland-i lokti atema inyaktsü ta nangzükba ama Social Welfare Department nungi RTI telangzüba anguba yimjak nung metetdaktsür, ta Media Cell sangdong ka nung shia lir.
2010 aser 2015 tsüngda Social Welfare Department nung CDPOs 3, Chief Instructor 1, Superintendent 1, Research Officer 1, Probation Officers 2, Supervisors 29, Care Takers 2 aser Matron 1 ‘Direct Recruitment’ ajanga shim. Department-i NPSC majangi aser tatidang magii dang mapa 40 tashi tim mesüi shim, ta Media Cell sangdong nungsa shia lir.
Supreme Court-i State of Bihar Vs Chandeshwar Pathak tsüngda ken o atema obendang agütsüba nung AD-HOC nung shimba densema advertisement mesüra selection process meinyaki shimba mapa ajak dang “Backdoor appointment” ta ajatsü. Anungji iba oren ya ozüngi amshitsü melar, ta ACAUT Nagaland-isa ashi.
2010 aser 2015 tsüngda NPSC ajanga mapa 8 nung nübo shimok aser tanüngba 40 ji “Backdoor” ajanga shimok. SW Department-i parnok sasep nung Secretary, SWD dangi item mapa asoshi NPSC nem tatidang agidakjang ta pa dangi züluba shiditem sayuogo saka ACAUT-i RTI nung Secretary, SWD-i NPSC dangi züluba shidi sayuang ta asüngdangba ka danga magütsütet, ta Media Cell sangdong nungsa shia lir.
RTI query no. 2 (d) nung shia aliba ama, SWD-i item mapa atema advertisement kar danga agütsür lira sayutsüla saka parnoki ibaji mesayutet nung, SW Department-i mapa 40 atema NPSC nem osang magütsü ta ACAUT-isa metetdaktsü.
Mapa ka atema advertisement melii, selection process shitak meinyaki aser NPSC ajanga open competitive examination magiba Ad-hoc/contract appointment ajakji ‘backdoor appointment’ ta ajatsü, ta ACAUT Nagaland sangdong nungsa shia lir.