Iran-i Syria sorkar anemer amaktsü ajungshir: Russia

Moscow, August 17 (Agencies): Iran mitkartemi par tayimtsü amshia Syria nung tesep tenteta alir Syria sorkar anemertem tanaben amaktsü tajungshiba olen ka Russia’er Defense Ministry-i tanü, Bodbar nü metetdaktsüogo.
Russia-i Iran den amalitepa Syria sorkar anemer anema amakba maparen inyakba ajanga United Nations (UN) telemtetba anema inyaker asütsü ta US-i sangoktsüba osang magizüki, Russia mitkartemi Iran-i tentetba mitkar tesep amshia, Syria sorkar anemer tanü agi anogo tanabuba amakba osang jangjaogo.
“Ozü Tupolev Tu-22M3 long-range bomber tayimtsütemi Iran’er Hamadan air base amshia, Syria kübok Deir al-Zor province nung tesep tenteta alir sorkar anemer amak aser par command post ana tashi poksatsüba den külemi, par züngsem nisung 150 dak tema tepsetogo,” ta ministry-i metetdaktsü.
Par mitkartemi kasa tesep amshia, yashi, Mongolbar nüa Syria sorkar anemertem amakba ajanga küm 5 tejaklen nungi tenzüka Syria nung tongpang rarabaren tamajungba kümdaktsüba den külemi, yamaji inyakba ajanga US  jashidaktsüba osang angazükogo.
Russia-i Iran’er mitkar tesep amshia, Syria sorkar anemer amakba ajanga UN Security Council telemtetba 2231 kübok densemba Iran-i tongpang nung amshitsü tayimtsü meyoktsü aser par linük dang kasa oset mayoktsü ocet anema inyaker asütsü ta US-i metetdaktsüogo.
Ajisüaka, “Ozü linüki Iran nem tongpang nung amshitsü tayimtsü magütsü,” ta shia, par mitkartemi UN telemtetba anema meinyakba olen ka Russia Foreign Minister, Sergei Lavrov-ia tanü metetdaktsü.
“Syria Tir, Bashar al-Assad-i aniba Syria sorkari benokba temepishiba olen agizüka, Iran den külemi amalitepa ozü mitkartemi Syria nung alir kiralongrar anema tongpang rarar,” ta Lavrov-i New Zealand Foreign Minister, Murray McCully den Moscow yimti nung senden ka amenba sülen osangbener den ajurutepdang ashi.
Russia-i nungitba Syria sorkar mitkartemi sorkar anemer ket nungi Aleppo yimti tanaben agishitsü merangba den külemi, Moscow aser Washington nati aroki lungjemer Syria’er ken o bentettsütsü asoshi sentong renemba mapang ka nung Russia-i Iran’er mitkar tesep amshia, Syria sorkar anemertem amaktsü tenzüker lir.
Russia-i Assad aser pai aniba Syria sorkar pusema nungiter saka Assad-i lenisütsü menden toktsüba ajanga dang Syria nung adokba mangatettep ken o bentettsü ta shia, US-i Syria sorkar anemertem pusema yarir.