Kashmir nung telungpurtemi Army amak, sepai 3 asü

Srinagar, August 17 (Agencies): Curfew ozüng benoka aliba Srinagar district kübok Anantnag jila aser Magam tesem nung tanü telungpurtemi Army convoy ka amakdang sepai ana aser police ka tepsetogo.
Police ketdangser kati, tanep züngia 2:30 ako meta Khwajabagh nung telungpurtemi amakdang sepai ana aser police ka yiru, ta metetdaktsü.
Pai ashiba agi, par asemprong asü aser telungpurtem anema operation sashia tenzükogo.
Kashmir nung tesüiba anogo 40 tashi nüburtemi longkak aita raradang tajemba agi nisung 65 süogo.
“Yashia security sepaitemi injang yokdang nisung pongu asü aser iba tesem, Budgam district nung curfew ozüng benoka lir. Ano Srinagar district, Anantnag town nunga kasa ozüng benoka lir,” ta police ketdangser kati ashi.
Kashmir onük lemtettsü atema alima lenirtem dang akhangtsü asoshi separatist teloktemi Sonawar nung aliba United Nations Military Observers Group (UNMOG) tashi oa longkak aittsü ayongzükba sülen iba office-i aoba lenmang ajak nung sepai aika lemzükja lir.
Separatist temi, parnok UN office-i moudaktsüra parnoki ghonda 72 mener longkak aittsü, ta metetdaktsüogo.
Separatist temi iba sentong ayongzüka aliba ajanga school, college aser nija office ajak shibangogo, iba den külemi sorkar office-ia nisung aika marur.