Mapang tetemsü nung jembiba

Mokorai aliba nung tashi tulu lir. ‘O jembibaji taribi, saka mokorai alibajibo Hon’ iba tangatetba ya linük aikati benshia arur. Asenok  aikati aiben tangari jembiba o angaba dang nungibo taliba jembir alir, kechiyong asenoki tangari jembiba matazükteter. Mokorai aliba ajanga shisatsü ainer, aika shisateter, tesünep angur, timtem nung majemoker mesüra tangar temulung meyirutsür. Timtem mapang mesüra ratamata-a aliba mapang kaka nungbo mokorai alitsüji junger, ajisüaka mapang tetemsü nungbo ola madoki malitsüla. O ya atamata masü, kechiyong alima ajak anokshidaktsüba tatalokbatem ya o tsüngro songa jembiteter takotet lenirtem ajanga lir. Lokti lenir kati o tsüngro songa jembiba den külemi mapang tetemsü nung jembitsüji kanga tongtibang.  India Ato Kilonser, Narendra Modi ya o jembitsü nung kanga tsüngro tasong, ajisüaka pai mapang tetemsü nung aiben mejembir. Centre nung sorkar tasen aruba sülen linük nung tatalokba jenti liaka Ato kilonseri item tatalokba atema mokorai alir mesüra kanga menur ang jembir, ibayongji Congress-i anir opposition party temi aiben pa dang tasüngdangba akar. Yaküm India nung Khristantem anema inyakba aser Tenla ki den Khristan rejutem raksatsüba tatalokba jenti liasü, ajisüaka Modi-i ola madok. Dadri nung nashi tepset, ta aija Muslim nunger ka tepsetba mesüra tawa Gujarat nung nashi kümzükertemi Dalit nunger pezü dak azükba densema linük tesem ajaklen Dalit nunger anema inyakba mapatem onük nunga pai mapang talangka ola madoki lia aruogo.  Tang tesüsa Kashmir nung joko anogo aika anogoshia nisung jenti asür, anungji Independence Day onük jembidang Modi-i Kashmir tensa indanga süoka jembitsü ta aikati bilem, saka pai Balochistan (Pakistan) aser PoK nung tatalokbatem indang ang jembiogo. Tawa tembangba Parliament senden nunga pai Kashmir onük jembitsü maongka trokben tashi ngua liasü, saka pai mejembi. Iba dak alia yaküm Maharashtra nung Vyapam ochimashi ken o, Lalit Modi mangatettep ken o, Jawaharlal Nehru University nung atalokba aser kiralongrartemi Pathankot amakba tatalokbatem nung pai mokorai liasü. Linük tekolak ka asünungji linük nung tongtibang tatalokbatem atemabo pai jembitsüji pa tata shilem. 2014 General Election nung Modi-i o kanga tsüngro songa jembiba ajanga pai India nunger vote agütsütsüpur jenti mulung kokteta liasü. Ajisüaka pa Ato kilonser kümer pai mokorai aliba ajanga aika süngmanger. Ita shia radio sentong ‘Mann Ki Batt’ ajanga Modi-i linük nüburtem den jembir, iba mapang nung pai sorkari inyaktetba terenlok mapatem indang jembiba dak alaka linük nung tongtibang tatalokbatem indang mejembir. Linük nung tilateri tatalokba ajak atema pai jembitsü menüngdak, ajisüaka pai langzütsü/jembitsü tim nungbo mapang tetemsü nung jembitsüji pa teinyaktsü mapa lir. Aji oda mesüra tarutsü nungbo sensotemi arendaka bilemtsü, Muslim, Khristantem aser Dalit nunger den tesentaktep tepilaba akümtsü. Ato kilonseri inyakba aser jembiba o ajakji pa anemertemi dang masü saka pa pusemertem aser nükshirtemia mita reprangdar ta angatettsüla. Linük senso ajak kümzüker tebudi ka ama  pai meinyaktetra tarutsü nung pa jenjang mejungi akümtsü südi. Mapang tetemsü nung jembiba aser inyakbaji kecha agia matoksatsü. Asen taküm nunga mapang kar nungbo asenok mokorai alitsü mesüra aremzüka atasatsü aser mapang kar nungbo o jembia inyaktsü yimya sübatsüla.