India aser China na tesentaktep meraksatsü bangjem

Beijing/New Delhi, August 18 (Agencies): India aser China linük na tsüngda onük kar nung odiodia tebilemba lemsatepba sülen, tangatetba balala ajanga linük tesentaktep meraksadaktsüi ken o jembiba ajanga bentettsü bangjemogo, ta Bodhbarnü China foreign ministry osang ka ajanga metetdaktsü.
China foreign ministry-i, “G20 Hangzhou Summit aser 8buba BRICS lenirtem senden matongdang Foreign minister Wang Yi-i India semdanga liasü, aser ibaji tongtibangsüa India den tongtepratep alitsü nükjidong nung liasü,” ta ashi.
Osangbenertemi asüngdangba ka langzüdang ministry-i, “Iba mapang nung linük anati telemtetba agiba tongtibangbaji senden anaprong takok angutsü atema pusemtsü  bangjem,” ta ashi.
Iba mapang nung China ketdangseri Goa semdanga BRICS, (Brazil, Russia, India, China aser South Africa) senden atema terenemshiba asadanga liasü. Iba senden ya taküm October ita Goa nung akatsü.
New Delhi nung August 13 nü Wang-i India foreign minister, Sushma Swaraj ajuru aser Ato kilonser, Narendra Modi-a ajurua liasü. Iba anogo nungji Wang Yi-i Sushma den senden amendang India-i NSG züngsem akumtsü atema benokba densema linük ana tesentaktep onüktem jembia liasü.
Taküm June ita nung linük 48 plenary senden alidang India-i Nuclear Suppliers Group (NSG) züngsem akumtsü atema benokba China-i nokdanga liasü.
India-i Nuclear Non-Proliferation Treaty (NPT) tezüngzüktep magiba nung ajemdaker India NSG züngsem akumtsü benokba China-i nokdang.
“Linük anapronglai, tangatetba balala dang nungibo külem tangatetba ka alitsüla, tetoktepba dang nungibo amalitep alitsüla, aser lenla ajunga nung tesentaktep meraksatsü atema inyaktsüla ta bangjem,” ta ministry-isa ashi.
“Ano külen linük anapronglai maneni ken o jembiba ajanga telemtetba tajung ka dangi arutsü bangjem,” ta parnokisa ashi.
Iba o ya India-i NSG züngsem akumtsü benokba China-i nokdangba, UN-i Pakistan nung amenoka aliba kiralongrar telok, Jaish-e-Muhammad tongti, Masood Azhar ji kiralongrar ta sangdongtsü atema India-i benokba China-i nokdangba dak sentakba nung jembiba lir.
“Linük anati tongtibangtiba lemtetbaji G20 Hangzhou Summit aser Goa nung BRICS lenirtem senden takok angutsü atema nungittsü bangjemba lir,” ta parnokisa shisem.