Aolijen lanurtemi temesepba yi pudena raksa indok

Aolijen lanurtemi apuba ozüngi memelaba temsepba chiyungtsü raksaa indokba mapang tangokba noksa nung angur. Aolijen, August 18, 2016.

Aolijen, Aug 18 (TYO): Aolijen (Ungma) lanurtemi mepu nung temesepba chiyungtsü nokdangtsü nükjidong yur mita aoba mapang ozüngi memelaba yi kar puteta itemji Brihostibarnep raksaa indokogo.
Iba mapa ya Aolijen yimdeni lanur nem tashi agütsür inyakba lir aser iba mepu nung yi ayoker aser shibelenertem khenyongi nokdangtsü tangatetba yur ibai inyak, ta Aolijen nung lanur kati iba osangbener den jembidang ashi.
“Mapa tajungji tila ka nungi dang tenzüker, aji oda, tang onoki inyakba mapa ya maneni inyaktsü aser ajaki iba tongpang anema noktaktsüla”, ta paisa tayongzükba ka agütsü. “Yi tongpang ya kanga tulu, aji saka, lungjemer inyakra akoktsü imlar”, ta paisa shisem.
Aolijen Baptist Arogo Fellowship Assoc. Pastor M.Toshi den sarasadema tanep item temesepba chiyungtsütemji raksa indok.  Iba maparen inyakdang Aolijen lanurtem den yimden aser fellowship tenük-telen balala nungi densema liasü.