Northeast nung railway line tasen 12 yanglutsü

New Delhi, August 4 (Agencies): Northeast nung railway line tasen 12 yanglutsü tenzükogo aser item ajak ya senteper railway line tasazükji kilometre 1,248 asütsü, ta Mongulbar nü ketdangsertemi sangdong ka ajanga metetdaktsüogo.

“Sq km 1,000 telungtet tesem ka nung railway line kilometre 20 alitsü nüngdaker ajisüaka tang tashi nung northeast nungbo sq km 1,000 telungtet tesem ka nung railway line kilometre 10.1 dang lir,” ta Hombar nü Minister of State for Railways Manoj Sinha-i Lok Sabha nem tezüluba ka ajanga telangzüba agüja liasü.

“Iba railway line tasen 12 yangluba nung sen crore 38,416 (Rs.384 billion) indoktsü,” ta paisa ashi.

Pai ashiba agi, railway line tasen yanglutsü atema 2012-13 küm atema sen crore 2,279, 2013-14 atema sen crore 3,392 aser 2014-15 atema sen crore 5,200 lemzüka agüja aruogo.

“Northeast tesem nung railway line maparen kara inyaka tembangtsü asoshi 2015-16 atema sen crore Rs.5,338 lemzüka agütsüogo,” ta Sinha-isa metetdaktsü.