Tesayur & yimtaklirtemi gari lenmang Km 10 shi yanglushi

Mokokchung, August 18 (TYO) : Phangsang Ad-hoc Town atema gari lenmang ka ang aliba kanga mejungi akümba ajanga iba Ad-hoc Town kübok aliba yimtsüng asem den jila ka nung sorkar school tenet nung tesayurtem aser nüburtem arok nübutoka iba gari lenmang Brihostibar (August 18, 2016) anogo nung yanglushiogo. Gari lenmang yanglushiba mapa nung nisung ajak agi 600-i shilem agi.
Gari lenmang yanglushitsü mapa ya Mokokchung nung alir Phangsang tesemtem nung tesayur inyakertemi anir tenzük. Mokokchung jila nungi Phangsang ya kilometre 30 shi pilar lir.
Tanü Brihostibarnü yanglushiba gari lenmang ya kanga temesü aser ibai küm meyi ana tiyonglen (2000’s) meta ka blacktop yokba sülen khen danga meyanglushiba ajanga kangasa mejungi kümer lir. Srokari teyari arutsü teimlatsü maliba ajanga parnok tesayur 60 shi-i ita ana sen terara saruteper Chakpa, Yaongyimti (Old) aser Yaongyimti (New) village council tem den Phangsang Adhoc town council tem den ajurutep.
Iba sülen August 18, 2016 nü nisung 600 shi adenshia iba tesem nung aliba yimtsüng pezü den jila ka indang gari lenmang katang alibaji kilometre 10 shi yanglushi.
Pick up truck anati den mini truck kati long belenba mapa inyak aser nüburtemi item longji gari lenmang nung tapok alibatem nung arangokja medema yanglushiba den lenmang sütaka aliba kilentsü merükteta among.
Chakpha, Yaongyimti (Old) aser Yaongtimti (New) village council chairman tem den Adhoc town council züngsemtemi iba mapa tajung apiteta inyakba atema tesayurtem dang kanga pelaba lemsatep aser State sorkar dang iba lenmang ya tekaratiba nung yanglushijang ta takhangba ka agütsüogo.
Ano tesayurtemia village council aser Adhoc town council züngsemtem den dena iba gari lenmang yanglushiba mapa nung yariteper nüburtem ajak dang kanga pelaba lemsatep.
Iba tesem nung sorkar school tenet (7) tashi lir— Chapha yimtak government primary school asem (3); Phangsang nung government high school ka aser GPS ka; Yaongyimti (New) nung GMS ka aser Yaongyimti (Old) nung GPS ka.
Iba tesem ya Mokokchung district kübok Langpangkong tsükong nung lir aser item school tenet nung tesayur 60 dak tema lir.