Gujarat:Dalit nunger tebur chanu ka dak azük, ana pua lir

Ahmedabad, August 20 (Agencies) : Arishi küm 15 tain, Dalit nunger tebur chanu ka tebui shiruru tasümang bener oa meintoktsü ta ashiba agi Brihostibar nikongdang Ahmedabad district kübok Bhavda yimtak iba tebur chanu dak parnok nisung anati azük, ta Honibarnü police-i ashi.
Tanubusang tebu Dinesh Parmar-i item nisung anaji anema Kanbha police station nung FIR ka benokogo.
Iba police station nung ketdangser Govindbhai Parmar-i, Prevention of Atrocities (Scheduled Castes and Scheduled Tribes) Act aser Indian Penal Code (IPC)-i melaba ama iba nisung ana anema case ka benokogo, ta IANS dang ashi.
Dinesh Parmar-i, class 10 nung azünger ozü jabaso, Harsh, Vankarvas kiyong nung medemer ka den mena lia yimer anati— Sahil Thakore aser Sarvarkhan Pathan—arua azük, ta police dang ashi.
July 11, 2016 nü Saurashtra nung Dalit nunger nisung pezü dak azükba atema Dalit telok longkak aitba mapang ka nung Harsh tebu dang shiruru tasümang intoktsü ashiba meintokba ajanga jabaso dak azük.
Una, Gujarat nung Dalit nunger pezü dak azükba lendong atalokba sülen Gujarat nung aliba yimtsüng aika nung Dalit nungeri longkak aita shiruru tasümangtem intokba anenogo.
“Tasümang intoktsüji onok mapa liasü, ajisüaka Una nung onok nisungtem dak azükba sülen onoki iba mapa meinyaktsü tenangzükba agiogo. Ni tangbo kü ita sen dak dang metaloker alir,” ta Dinesh Parmar-i ashi.
Police Station Officer Govindbhai Parmar-i, Harsh o par medemer na den item nisung ana yagi arua tebang agi rara menaba sülen pa dak azük. Pa kanga mejungibo meyiru ajisüaka onoki pa mozü kidangi anir oa mozü agidaktsüogo,” ta ashi.
Iba tatalokba yagi Harsh kanga aoksa anungji pa Vastral, Ahmedabad nung aliba tenü’er kidangi khen atema anir oa lir.
“Ozü jabaso kanga aoksaba agi yimtak malitsü ta ashir, anungji ni pa küno’er kidangi yokogo,” ta Dinesh Parmar-i ashi.