Iraq sorkari kiralongrar nisung 36 tashi tepseta merenshiogo

Baghdad, August 21 (Agencies): Iraq sorkari kiralongrar nisung 36 tashi lisü agi alenseta tanü, Deobar nü merenshiba osang ka Iraq Justice Ministry-i metetdaktsüogo.
Baghdad anüdoklentip tsütsülen tentetba mitkar tesep toktsür ajener Shiite nunger mitkar züngsem nisung meyirijang dak tema khen nung tepsetba ken o nung aitsüba sülen tanü kiralongrartemji merenshir lir.
Tan kiralongrartem tepseta merenshibaji Islamic State (IS) kiralongrar teloki 2014 küm nungi tenzüka Iraq anüdoklentip aser anülulen tsütsü densemba tesem tulubaka tashiyim agi agiba sülen Iraq sorkari kiralongrar nisung timtiba khen nung tepseta merenshir lir.
Tanü kiralongrartemji Iraq anülulentip tsütsü, Nasiriya yimti nung tentetba tepuokdak tepseta merenshiba osang ka ministry-i metetdaktsü.
IS teloki küm 2 tejaklen taoba mapang US mitkar tesep tentetdak, Camp Speicher tashiyim agi agiba sülen iba tesep toktsür jenshir Iraq mitkar züngsem 1,700 shi khen nung tepsetba osang bushiteta lir.
Baghdad yimtiba nung tentetba tongti shishilembadak bomb lendong atalokdakja nisung 324 shi tepsetba sülen Shiite yimsüsürtemi tasüba temerenshi agüja alir kiralongrar tepseta merenshitsü asoshi ajungmeso aser Iraq sorkari par takhangbaren meindokteti tan kiralongrar nisung 36-ji asangsang nung tepseta merenshir lir.
Tanü tepseta merenshirtemji mezüngsemi, Iraq sorkari taküm küm tenzüker tanü tashi nung aibelener nisung 45 tashi tepseta merenshiba osang ka ministry-isa metetdaktsü.
Tanü tashi nung Iraq sorkari aibelener nisung 1,200 shi nem tasüba agi merenshitsü obendang agüja aliba osang ka United Nations (UN)-ia metetdaktsüogo.
“Iraq sorkari aibelertem tepseta merenshiba maparen ajema inyaktsü ajungshir kechiyong par linüki memeteti aibelena malirtema tepsetadoker alitsüa ana nung dang lir,” ta UN High Commissioner  for Human Rights, Zeid Ra’ad al-Hussein-ia metetdaktsü.