Tanü Agartala nung Dipa Karmakar pela agizüktsü

Agartala, August 21 (Agencies) : Hombarnü Agartala nung nisung meyirjang aika gymnast Dipa Karmakar aser lar coach Bishweshwar Nandi na pela agizükba sentong nung adentsü imlar.
Tripura Sports Council nung Sports & Youth Affairs department aser sorkar kübok tanga department temi Vivekananda Stadium nung tena pela agizükba sentong tulu ka agitsü atonga lir.
Lar state tonga aruba sülen Dipa-i hopta ana shi saisapong nungi anisüngzüktsü aser iba mapang la M.A. tatidang atema renemtsü.
Asüngnep 10:00 ako nungi agitsü aliba sentong nung mendenji Chief Minister, Manik Sarkar asütsü aser Sports & Youth Affairs Minister Sahid Choudhury aser la den inyakertem den külemi saisapong nung mongintem, tongtipang nisungtem aser ketdangser aika iba sentong nung adentsü imlar.
Agartala nung sorkar aser sorkari teyari agütsüba school ajaki tesayurtem aser kaketshirtem Dipa Karmakar pela agizükba sentong nung adentsü atema yoktsü.
Dipa aser lar coach Bishweshwar na jeep ka nung yimdong süa senzütsü aser iba cavalcade nung motorcycle aser gari 200 adentsü, ta osang angazüker.