Arishi küm 75 tashi

India nung ato kilonser Narendra Modi kübok Union government nung inyaker kilonsertem arishi küm 75 tashi dang inyaktsü asoshi tangatetba ka renema inyakba ya kanga junger ta bilemer. Ibayongji, Najma Heptullai lasasa taoba ita Minority Affairs kilonser menden toktsüba osang asenoki angashiogo. Atangji, pur medemertemi temulung lemtettsüsa aser mapa inyaktettsüsa temang junga lira tang amaji governor mesüra tanga tongtibang mapa kar nung amshitsüa akok, saka anogo shi tekolok aser temang belema inyaktsüsa yimten yimsüsüba mapa nungibo arishi küm 75 sülenbo anisüngzük agütsübaji shitak lir. Yimten yimsüsürtem aikati yimten mapa nungbo kodanga mapa nungi anentsü asoshi ‘retirement’ anogo lateta maka ta jembir, Ajia shitak, kechiyong tanü government nung yimsüsürtem asoshi mapa nungi anentsüba arishi anogo kecha lateta maka, iba jagi tesenzü majung tambur tantsür kümaka election-i inür aser yimsüsüba menden metoktsüner. Atangji, tashidak maket temang junga alirtembo arishi küm 80 alemaka temang nung tashi itta alitsüa akok mesüra küm noklang junga aliyonga temulung tazüng aser tenük telen shitak alitsüa akok, ajisüaka Narendra Modii angatetba amaji nübortem tenzüktsüsa tekolok aser temang jetperaa senzütettsüsa alitsübajibo arishi küm 75 tashiji dang asütsü. Ashiko, kar asoshibo arishi küm 75 jia aika asütsü. Iba tangatetba nung yimten nung tamalen purtemi ozüngsa lateta meliaka, center nung amaji, pei arishi küm 75 jungerbo lanurtem nem maongka agütsü nung kanga ajungtsü. Nisung ka asoshi tekolok, shisatsü aser temang agi ayima inyaktsüba mapangji arishi küm 30 nungi 60 tashi asütsü. Atangji, arishi küm 30 majungdangyongi karbo yimten nung shilem agitsüsa maongka angur, itemji balaka, ajisüaka talisa Naga nunger ama ano tangang shisa tenük lapoka aortem atemabo arishi küm 40 nungiang shisatsü tain akümer, anungji maongka angu nungbo shitakba alima aser nübortem asoshi shisatsü tain kümer tashi itta inyaktsüba mapangji nisung ka asoshi arishi küm 40 nungi 60 tashi mesüra 75 tashiji asütsü,Ibayongji, yimten yimsüsüba mapa nung pei mapa (profession) küma inyaktsü mulungtettertem asoshibo küm 25 nungi shilem agitsü tenzüker. Ibaji angateta India temzüng arla 84(b) nung aser 173 (b) nung Lok sabha aser Legislative assembly nung election nung tokteptsü purtem asoshi arishi küm 25 nungi melaa lir. Iba amaji lanur asüdang nungi yimten nung shilem agia intet nung dang arishi küm 40 mesüra 50 ajungdangbo joko maparen aika ajangshia meteter asür, anungji menden temaba nung mener yimten khuret tuluba bentetter. Iba tangatetba nung asen lima nunga tamburtemi lanurtem nem maongka agütsütsüla aser lanurtemia lanur asüdangyongi yimten aser loktliba khuret meteta nüken belem arema shilem agitsüla. Tanübo asen lima nungbo tenük agi angu tashibo mesüra peisasa jajatet tashibo yimten yimsüsüba mapa nungi dang masü saka government mapa nungi manenner. Iba jagi lanurtemi jangrayonga maongka mangur. Ano, yimten yimsüsübaren nunga government mapa nung arishi küm 60 tashi inyaker külena shilem aginür. Shitakba shidi asünungbo arishi küm 60 alemer election-i aitsü agibo lanurtem kar ajungshia yok tajungba. Iba tangatetba nung Nagaland nunga ozüngi anenang ta mashiyonga arishi küm 75 alemertembo peisasa anentsüla aser lanurtem nem maongka agütsütsüla. Iba kasa tangatetba nung rongsen aser tangatetba liaka sorkar mapa nung arishi küm 60 tashi inyakertembo election-i maiang tajungba, kechiyong irr adokyonga temulung bilemba ama mapa agi meinyaktettsü. Asenoki teti lanur lima aser lanur mapang ta jembir saka yimten yimsüsürtemi küm 75 jungaka menden maitsüra aser government mapa nung küm 60 tashi inyaker ano yimsüsür akümtsü merangra, lanur putu aser lanur mapang nung tambur tantsürtemi anir asütsü. Tanübo asenoki tangar meneptsüba ser nung memeneptetbaji tangarbo lanurtemi anir saka asenokbo tamburtemi anir ta asüba ajanga lir. Atangji, ibaji tamburtem tai masü saka lanurtem takidak makaba ajanga asütsü .