ACAUT teloki GPRN/NSCN mapa aitsür

Dimapur, August 21 (TYO) : Kohima nung tan August 19 nü dokan nung inyaker Naga nunger asangur ka GPRN/NSCN telok nung inyaker kati maksüja tarak keta merenshiba atema kanga sashi aitsür ta ACAUT teloki metetdaktsüogo.
Iba anogo nung Naga nunger asangur ka dak GPRN/NSCN nung inyaker nisung ka tenüng agi, Pitovi-i kecha mebilemdangi teka sotakbaji miim kanga mejungi aliba mapa ka lir ta ACAUT telokisa metetdaktsü.
State sorkari iba aibelensangji aputsüla aser nisung dak tashiyim agi zübo ketja merenshir nisung asem anema FIR agüja alibaji magientsü atema NBAK teloki takoksa ajururtemji metoktsüi anüktsüla ta metetdaktsü.
Tang Naga lima tensa melenshitsü asoshi iba ama ozüng alema inyakba mapa anema Home Minister aser Chief Minister na pronglai ola adoktsüla ta ACAUT telokisa metetdaktsü.
Naga nunger business inyaker dak zübo ketja merenshibaji tang mezüng masü, saka taoba mapang nung atalokdanga state government-i item ama ozüng raksaba mapatemji aija ola adoka mali ta ACAUT telokisa metetdaktsü.
Iba ama ozüng raksaba mapa atalokdang government-i ola madoki yutsübaji lendong lir, kechiyong iba jagi government-i nübortem taküm aser rongsen samaba indang kecha hau ta bilema mali ta sayur aser tanabuba nung ozüng raksaba mapatem anema nübortemi mulungba ka inyaka parnoksasa kümzüka liang ta metetdaktsüba amato akümer. Iba mapa jagi state sorkar mapa nung tamakok tulu anguba tensa tia sayur ta ACAUT telokisa metetdaktsü.
Tan August 12 nü Wokha nung atalokba mapaji state government aser district administration atema mejanga aliba mesor amai bilemtsüla, kechiyong peisasa pei meraketa bilemba DC kati pa alidak ano yimten balaka ‘Town Commanders’ kübok ayutsü memelatsü ta ACAUT telokisa ashi.