Social Welfare dept-i teyari agütsübaren tajungba inyaktsü

Kohima, August 21 (TYO) : Nagaland nung Social Welfare department ajanga mulungtet teloktem (NGOs) nem nübortem nüngdak balala nung yaritsü asoshi senotsü teyari agütsüba maparen shitak timi inyaktsü asoshi Nagaland Public Rights Awareness and Action Forum (NPRAAF) teloki akangba ama inyaktsü asoshi Social Welfare Director aser pa den külemi inyaker ketdangsertemi nangzükogo ta tanü sangdong ka ajanga NPRFAAF teloki metetdaktsüogo.
Kasa sangdong nung ashiba agi, Social Welfare Department-i Nagaland Public Rights Awareness and Action Forum (NPRAAF) telok jaoka August 19 nü to Directorate Office, Kohima nung senden ka liasü aser iba senden nung NPRAAF teloki aginüba ama Social Welfare Directori tang nungi mapa meinyakba mulungtet telok nem teyari magütsütsü aser Social Welfare department nungi teyari angur teloktem dang nungi küm shia parnoki inyakba mapa indang osang meshitsü agizüka yuogo.
Ano, Social Welfare Directorate nungisa telok shirnoksa senotsü teyari angutsüba lir, parnok dang anogo 45 tsüngda teyari agizüka bener aotsü atema parnok dangi office nungi shidi zülutsü aser osangkakettem nunga adoktsütsü ta agizüka ayu.
Social Welfare department-isa mulungtet telok shia senotsü teyari balala anguba kuliji ashitsü aser senotsü teyari agütsübaji India government-i agütsüba inyakyim ajanga dang agütsütsü mulunga agizük.
Koba NGO nem teyari agütsüdir agütsüaka tagizüker telok (NGO) tenüng nung mesüra parnok NGO account nung indangindanga senji enoktsütsü aser teyari angutsü atema mulungtet telok shimdang Home department nung society register süa aliba kisüng magii tangar nem teyari agütsütettsüsa lenmang lapoktsütsü department-i agizüka yuogo.
Ano, mulungtet telok shirnoksa teyari agia aliba anentsüdir, itemji kechiba anentsüar kuli agütsütsüla mesüra kuli kecha meliibo ajungbena manentsütsü ta department-i NPRAAF teloki ashiba o ka agizüka yuogo.
Küm shia Social Welfare department den teyari angur lokti tentettem (NGOs) senden lia mapa tajungba inyaka aotsü merangtsü ta department-isa nangzük.
Social Welfare department nungi teyari angur NGO-tem nungi sen katizüka agiba atema inyaker ka nem temerenshi agütsüba atema social welfare Director, Wb.T. Merangtsuba Aier dang pelar ta NPRAAF telokisa metetdaktsü.