Bihar:BJP lenir ka taküm piyong tepuokdak ayutsü

Patna, August 22 (Agencies) : Bihar nung BJP lenir Jitendra Swamy-i arishi küm 16 tain tebur ka puer oa tepsetba ken o nung Hombarnü Bihar court kati aitsüba sülen tepuokdak akhumli piyong ayutsü obendang agütsüogo, ta sorkar lawyer kati ashi.
Swamy nem iba obendang ya Siwan nung Additional District aser Sessions Judge, Avadesh Kumar Dubey-i agütsü.
Swamy-i 2000 küm Maharajganj assembly constituency nungi Janata Dal-United candidate asüsang Damodar Singh teno, Bharat Singh puer oa tepsetba aibelen court-i jangjaba sülen August 12, 2016 nü pa aija liasü.
Swamy ya tesüiba mapang Rashtriya Janata Dal (RJD) nungi MP Umashankar Singh’er jabaso lir.
Bharat Singh ya February 15, 2000 nü pua bener ao aser anogo ana sülen ang pa tasümang agu. Iba tatalokba sülen tedi-i Swamy dak tai tonglokja FIR ka benok, ta police ketdangsertemi ashi.
2012 küm tsünglangba court katibo Swamy tai mali ta obendang agütsü, ajisüaka Bharat’er kinungertemi iba odendang Patna High Court nung jazükba sülen court-i iba ken o tanaben jembishitsü tetuyuba agütsü.
2013 küm Maharajganj constituency nungi Uma Shankar Singh, MP menden nung mena lia asüba ajanga Lok Sabha election bypoll nung congress ticket amer toktepba nung Swamy-i takok ngua lir.
Swamy ya yaküm ang Bharatiya Janata Party (BJP) nung aden aser 2015 assembly election nung Daraunda constituency nungi takok angu.