Banwarilal Purohit-i Assam Angh mapa melenzükogo

Guwahati, August 22 (Agencies) : Hombarnü Banwarilal Purohit-i Assam nung Angh inyaktsü tenangzükba agiogo.
Tanü Raj Bhavan nung Gauhati High Court Chief Justice, Ajit Singh-i Purohit nem tenangzükba agidaktsü.
Nagaland Angh, Padmanabha Balakrishna Acharya-i Assam Angh repsema inyaka liasü aser Purohit-i iba mapa melenzük.
Purohit ya Maharashtra nungi lennir ka lir aser 1977 küm pa yimten mapa nung mezüng tetsüng ajemok. 1978 küm pa Nagpur east menden nungi takok ngua Maharashtra Assembly nung züngsem aküm aser 1980 nunga Nagpur south nungi pai takok ngua 1982 küm minister aküm.
1984 aser 1989 nung pa Lok Sabha züngsem aküm aser Defence Ministry nung Parliamentary Consultative Committee züngsem ka ama inyak.
1996 küm pa tanaben Lok Sabha nung takok angu aser Parliamentary Consultative Committee on Home Affairs, Standing Committee on Defence aser Public Sector Undertaking Committee nung züngsem ama inyak.
Mahatma Gandhi atema tesayur Gopal Krishna Gokhale-i mezüng tenzükba English osangkaket ‘The Hitavada’ tanaben shia arudaktsübaji Purohit ajanga liasü.
Pa ketdangsüba kübok ‘The Hitavada’ ya India tiyongtsü nung osangkaket tajungtiba aküm aser Nagpur nung headquarters dak alia Jabalpur, Raipur, aser Bhopal nungia iba osangkaket adok.