Rio Olympics tembangogo; taruba Olympics Tokyo nung asayatsü

Rio de Janeiro, August 22 (Agencies): 2016 Olympic Games Brazil kübok Rio de Janeiro yimti kübok Maracana Stadium nung yasüng, Deobar aonung tembangogo.
Taruba Olympic Games Japan kübok Tokyo yimti nung 2020 küm asayatsü renema lir.
“Ni taküm alirtem rong nung tepelatiba nisung lir. Rio-i otsü tasen yangluogo… Tokyo 2020 asayamonga takok ngua agitsü sarasademtsür,” ta Rio 2016 organizing committee nung Tir, Carlos Nuzman-i yasüng metetdaktsü.
“Rio de Janeiro nung Olympics asayamong takok angua asayaba ya tarutsü putu atema senmang tajung yutsür lir. Ni 2016 Olympics Games shibangtsür aser alimar lanurtemi 32 buba Olympics asayamong nung toktepa shilem agitsü asoshi Japan kübok Tokyo nung senteptsü ayongzüker,” ta International Olympic Committee (IOC) Tir, Thomas Bach-ia sangoktsü.
31 buba Olympic Games shibangba sentong nung Japan Ato Kilonser, Shinzo Abe-ia nungtugu video game asayatsüren, Super Mario ama shilem agia liasü.
Alima linük 205 shi nungi asayar 11,000 dak temai saisapongtsü shilem 42 tashi nung anogo 16 tashi toktepa shilem agiba sülen tan Olympics asayamong tembanger lir.
Olympics asayamong shibangba sentong tembangba jakdang, Bach-i Olympic wako agizüker Tokyo Govenor, Yuriko Koike nem amokja liasü.
America teloki gold 46, silver 37 aser bronze 38 densema, ajak agi medal 121 tashi agizüka, tan asayamong nung temaba jenjang angur telok aküm.
America sülen anidaka, gold 27, silver 23 aser bronze 17 densema ajak agi medal 67 agizüka, Britain-i 2 buba aser gold 26, silver 18 aser bronze 26 densema, ajak agi medal 70 agizüka, China teloki 3 buba jenjang ajangzük.
Olympics tayonger, Brazil telokia gold 7, silver 6 aser bronze 6 densema, ajak agi medal 19 agizüka, 13 buba jenjang angu aser India teloki silver 1 aser bronze 1 densema, ajak agi medal 2 agizüka, 67 buba jenjang nung tembang.