Pfutsero GHSS-i 55 buba Annual Sports Week agiogo

Dimapur, August 23 (Agencies): Government Higher Secondary School (GHSS), Pfutsero-i par school ground nung 55 buba annual sports week sentong tanü, Mongolbar nü agiogo.
Tanü sentong nung Wonthungo Tsopoe, Additional Director (HOD), School Education tongti tesemdanger liasü.
“Kümshia agiba asayamong takok ngua ayongba atema GHSS Principal, tesayur aser mapa inyakertem den pelaba lemsateper. Government High School (GHS) nungi GHSS küma temaba jenjang nung ajungketba densema, GHSS, Pfutsero nung terenlok jenti aliba ngua, kanga pelar,” ta tongti tesemdanger-i metetdaktsü.
“School inyakyim aser mapatong balala rong nung saisapongtsü ya tongti shilem ka lir. Saisapongtsü tetoktepba balala nung shilem agiba ajanga kaketshirtem rong nung shisatsü nung dang masü saka shi nunga terenlok lidaktsür. Ano, saisapongtsü sabang ya tanü putu nungbo rongsen tajangzüka bener arutsüba tongti sabang ka kümogo aser asayar tajungtemibo pei linük aser state nem konang nungsang bener arutsüba den külemi, saisapongba ajanga pei tepoka mesütettsüsa lenmang angur,” ta Wonthungo-i metetdaktsü.
Tongti tesemdanger-isa GHSS nung Closed-Circuit Television (CCTV) aser Resource Room lapoktsüba osanga jangjaogo.
Kaketshisatsü sayutsüren aser tangzükbaren na nung tesayur aser kaketshirtemi tajungba shilem agidaktsütsü nükjidong nung classroom shia nung CCTV mesenlokba aser tesayur aser kaketshir napronglai nungdakba kaketshisatsü teyari ngudaktsütsü nükjidong nung Resource Room tentettsüba osang ka Principal, GHSS, Vechikhoyi Lohe-ia metetdakja liasü.