Mapa kabosa inyaktsüla

Naga nunger linük tenzükertem asoshi ibai kecha meinyaki yimten nüchiso indang dang jembia kazüba mesüra senzüba putu masü saka pei kibong mesütsü asoshi mapa kabosa inyaka linük tenzüktsüba putu mapang ka lir. Atangji, alemli ama ‘ceasefire’ maliba mapangbo tema nung sademsadema ali majung, anungji tema nung lia pei taküm aser kibong asoshi mapa inyaknüaka meinyaktetba mapang liasü. Ajisüaka, tangbo tsükchir mali ajak den yimjung nung alir asünungji linük tenzükba mapa nung lia pei asoshia pei inyaktetba mapa kabo inyaka alitsü akoker. Atangji, linük tenzükba mapa asünungji nisung karbo mapang aser taküm ajak bendanga agüja (full time) inyaktsüsa akümer, item kibongtem asoshi par yimten jagi reprangtsüla. Ajisüaka, linük asoshisa süaka shirnok anogo piyong inyaktsüsabo mapa maka, parnoki pei mapangji amajok nung meindoki pei akokba mapa ka pei kibong asoshi inyaktsüla. Linük tenzükba mapa nung inyakertem o arogo tenzükba mapa nung ita sen magi inyakertem na maparen mesüktepa lir. Arogo nunga toklang tenzükertem kar dak alaka deacon nungi shir Sunday school tesayur aser mapangsertem tashi tenzükertem ajak ita sen magi angati tenzüker. Anungji, arogoi parnok mesür masü saka parnokiang arogo mesür. Iba tangatetba nung parnoka pei pei mapa nung meranga inyaker. Aji oda, parnok tenzüker shiaji pei taküm aser kibong mesütsü asoshi mapa kabosa inyaker aser arogo nem agütsüba nübo ajungaji angati aser iba denji parnokiang meyiper arogo nem tenla agütsür, kechiyong arogo nem agütsübaji Tsüngrem nem agütsür. Iba kasa tangatetba nung tanü Naga nunger ajungai Naga yimten asoshi linük tenzükba mapa nung nübo aser rongsen tenla agütsütettsüsa mapa kabosa inyaktsüla.Iba amaji ka meinyakra linük tenzükertem dang masü saka Naga nunger ajak akoksatsüsa nüchiso bushiba mapa ya talangka bener moutettsü. Akhidang ama masü, joko nübortemi saru magütsüli asür. Ibaji yimten mangatetba agi masü saka telok aika kümadokba agi tezü atanger. Aji oda, linük tenzükba mapa nung inyakba ajak ya pei lima aser nübortem asoshi angati tenla agütsüba mapa ka dang lir. Ibaji mangatet ser linük tenzüker kari danga saru sarua pei taküm aser kibong alitsü merangra kanga timatemtsü. Atangji, linük tenzükertemsa asüyonga kasa masü aikati angateta lir, anungji tanübo linük tenzükertem aika pei pei mapa nung mazüngi inyakba angur. Item jagi linük tenzükba mapa nung angati nübo agütsütetter aser tangar dang meshitsü melen parnokiang agütsür. Aji oda, tanü putu nungbo tashiyim agi saru saruba agi asenoki asen yimten mapa bener moutettsü. Tashiyimji anogo ka atema dang, ibajiserbo anenadoktsü. Ajisüaka, kechi mapa südirsüaka tangatetba agi inyakra nükjidong matong tashi maneni otettsü. Linük tenzükertem meshimetsüa mesenzütsü aser pei kibong meraketa anepalutettsü atema mapa kabosa inyaktsüla ta lemsatepba ya  government mapa ka nung mapai mao ita sen chia kazütsü ashir masü saka asen lima nung ya business tapu  aika lir. Item business lenmangtemji pei jangraba aser pei inyaktettsüba lenmang kar bushiteta inyakra, na jangratema tangar tsüngdang nümadangdanga alitsü aser linük nüngdak nung nai tongzüktettsü. Aji oda, asen lima nung dokan ajak tsümartem nem mendaktsütsü aser parnok dang nungi asenok saru tera meshia agitsü ta asüba dang nungibo dokantem ya asenoki amentsü aser linük asoshia asenoki tenla agütsütsü ta asüba kanga agia tajungba. Aji oda, dokansa mamenyonga inyakdi serbo mapabo inyaker meinyakma lir. Iba ama tangatetba aser shisatsü ya asenoki asenok medemer, kinunger aser linük tenzükertem lemsatepa yaritepra, iba jagi asenok longjemer asen lima yangerba nung shilem tajung agir asütsü. Linük tenzükertem kar danga kecha meinyaki meshimetsüa senzüa lira tesenzü , kechiyong linük tenzükba mapa ya meshimetsüba mapa masü saka linük aser nübortem asoshi pei taküm, mapang aser rongsen tenla agütsüba mapa lir. Iba tenlaji kabosa asenokia asen lima aser nübortem asoshi agütsütettsüsa mapa kabosa nendaknendaka inyaka linük tenzükdi.