Amit-i tebu Kishore Kumar nüngtem nung kensep ka saya

August 04 (Agencies): Bollywood kentener tejen Kishore Kumar’er jabaso Amit Kumar aser semchir Muktika Ganguly nati tanü pa arishi küm 86 ajungba anogomung nung “Baba Mere” kensep sayaogo.
Osangbenertem den jembidang Amit-i, “Kensep tasen “Baba Mere” aser ozü label, Kumar Brothers Music sayaba ajanga tanü kübu asoba anogomung amonger. Iba kensep ya kübu nüngtem nung adoker. Iba ya onok asoshi temulung shirangtsü mapang ka lir,” ta metetdaktsü.
“Mapang ajak nung pa (Kishore Kumar) kentener aser actor rongnung tajungtiba liasü. Pa ama shinga maliasü aser pa ama shinga malitsü,” ta kentener Amit-i ashi.
Iba anogo nungsa Kishore Kumar’er jabaso ana-Amit aser Sumeet nati parnok music label – Kumar Brothers Music (KBM) sayaba den ken trok aliba kensep “Baba Mere” sayaogo. Iba kensep ‘title’ ken ji Kishore’er semchir (jala) arsihi küm 10 Muktika Ganguly-i aten.
“Iba video nungji Muktika ayaterm nung saaker aser lai pungmang nung tebou ajurur. Iba kensep ya film ka mesüka lir,” ta Amit-isa ashi.
Iba kensep nung aliba kentemji Amit-i mejem aser Leena Chandavarkar Ganguly-i zülu, iba den Ramesh Iyar, Gaurav Vasvani aser Sumeet Kumar nungeri arrangement agi.
“Iba kensep ya kübu nüngtem nung adoker. Kentem kanga tanep aser kensü ola tajung, tangartemi meimtsü ta onoki amanger,” ta Kumar-i ashi.
Kishore Kumar ya India nunger film nung playback kentener, actor, ken zülur, mejemer, producer, director aser film otsü zülur ka liasü. Pa August 4, 1929 nü Madhya Pradesh, Khandwa nung aso aser October 13, 1987 nü asü.
Kishore-i Hindi ken dang masü saka Bengali, Marathi, Assamese, Gujarati, Kannada, Bhojpuri, Malayalam, Odiya, aser Urdu oshitem nunga ken aika tenogo.
Pai Best Male Playback Singer indang Filmfare Awards ti tashi agizüka liasü aser Filmfare Awards, iba category nungbo tanü tashi shingaia pa matoksar.