PT Usha taküm otsü film yanglutsüla: Sonam Kapoor

Mumbai, August 24 (Agencies): India’er tesüiba tetsür track aser field athlete, P.T Usha taküm otsü nung ajemdaker film yanglutsü tajungshiba olen ka Bollywood actress, Sonam Kapoor-i metetdaktsüogo.
Mumbai yimti nung agiba IMC’s Ladies’ Wing Golden Jubilee benjungmong sentong nung o jembidang Sonam-i iba olenji metetdaktsü.
“Ni tawa tangar taküm otsü nung ajemdaker yangluba film nung shilem agiogo. India’er tetsür tongti asayar, P.T Usha taküm otsü nung ajemdaker film yanglutsü nungdaker,” ta lai ashi.
Usha ya India ajunga nung athletes tajungtiba ta züngshir aser la dang ‘Queen of Indian track & field’ ta ajar.
“Milkha Singh densema, asenoki asayar mongintem indang taküm otsü nung ajemdakba film balala yangluogo. India ya nütsüng yongsük jenti aliba linük ka lir. Anungji, taküm otsü nung ajemdaker film yanglutsüsa nisung takotet jenti lir,” ta lai shisem.
Ano, tetsürtem kaketshisatsü agütsütsü mapatong nung sorkari tang agütsüba den rongsen timba agütsüdaktsünüba olen ka Sonam-i metetdaktsü.
Shashanka Ghosh-i direct süa yanglutsü renemba ‘Veer Di Wedding’ film nung Kareena Kapoor Khan den aroki lungjemer tongti shilem agitsü Sonam-i sentong renema lir.