Jennifer Lawrence alima nung sen timtiba aazüker actress kümogo

Los Angeles, August 24 (Agencies): Hollywood actress, Jennifer Lawrence alima ajunga nung sen timtiba aazüker actress akümba osang ka Forbes magazine-i metetdaktsüogo.
Jennifer-i taküm agi kümnabuba tashi atonga alima ajunga nung sen timtiba aazüker actress akümtsü jenjang tajung angur lir.
Alima ajunga nung nüburtemi kanga dang sapua reprangba ‘Hunger Games’ film nung tongti shilem agila, Jennifer-i taoba ita 12 tsüngda nung sorkar nem saru agütsüba jakdang, ajak agi dollar sen million 46 aazükba osang bushitet ta Frobes-i metetdaktsü.
Tarutsü mapang yanglutsü renemba ‘Passengers’ film nung shilem agitsü atema sen shilem ka agütsüba sülen lai taküm küm asoshi sen timtiba aazüker actress akümtsü jenjangji ajangzük.
Ajisüaka, lai taküm aazükba senji yaküm, 2015 küm aazükba sen noklang shilem nung shilem 11.5 agi tajemba aliba osang bushitetogo.
Ano külen, ‘Ghostbusters’ film nung tongti shilem agitsü atema sen shilem ka agütsüba densema, Melissa McCarthy-ia ajak agi dollar sen million 33 aazüker actress küma, sen timtiba aazüker actress tarensen nung lai tanabuba jenjang nguogo.
‘Captain America: Civil Wars’ film nung tongti shilem agila, Scarlett Johansson-ia ajak agi dollar sen million 25 tashi aazüka, sen timtiba aazüker actress tasembuba akümba osang angazükogo.