MTLT-i power department indang office tem shibangtsü

Dimapur, August 24 (TYO) : Mokokchung Town Lanur Telongjem (MTLT)-i Mokokchung nung power khuret atema takhangba kar agütsüogo aser bangdakpurtemi tezüluba nung menangzük tashi Mokokchung nung power department indang office tem shibangtsüba melapoktsü ta metetdaktsüogo.
Bangdakpurtemi iba khuret atema süoki ia bilemtsüla aser takhangbatem mapa küma inyaktsüla, ta MTLT sangdong ka nung metetdaktsü.
2015 küm MTLT-i takhangba asem agütsü saka itemji tanü tashi mapa küma meinyaker. Takhangba asemji power station nung 5MVA transformer mejungi aliba transformer tuluba kati melentsü, power station nung tang aliba 2.5 MVA tuluba akümtsü aser rongdak mapang amshitsü atema power station nung spare transformer ka ayutsüba lir, ta MTLT sangdong nung metetdaktsü.
2015 küm District Planning & Development Board senden nung temaba jenjang luden züngsemtemi MTLT dang Majakong Ward nung power station (10MVA) ka yanglutsü aser Salangtem nung aliba sub-station nung 10MVA talila bendenloktsü ta nangzük, saka itemji mangur. Anungji nangzükba ama power station ji yanglutsüla, ta MTLT-isa metetdaktsü.
Electricity Act, 2003 Arla 166 nung District Coordination Committee-i ita asem nung khen ajurutepa district shia nung electrification extension mapa reprangshimtsü lateta lir. Deputy Commissioner menden ser Committee ji tenteta mapa inyaker süra, transformers mesüra tanga osettem raksaba timtem madokdaktsütsüla, anungji Electricity Act, 2003 Arla 166 sülen anidaktsüla, ta MTLT-isa takhangba agütsü.
All Ward Union Mokokchung (AWUM)-i Mokokchung Town atema transmission line balaka alitsüla ta takhangba agütsüba aser July 2016 nungi sorkar nem electricity bill magütsütsü lemtetbatem MTLT-i pusema nungiter.
2014-15 financial year tsüngda Mecovo Power Works, Dimapur nem Mokokchung Power Division nem mapa inyaktsü atema sen lakh 50 shi ka agütsü ta osang tejangja angazükogo. Anungji anogo tenetnü (7) tsüngda iba utilisation certificate ya MTLT office ket nung agütsütsü takhangba agütsür, ta MTLT-isa metetdaktsü.