Shurhozelie-i yimsüsürtem dang aibelenbatem metongshitsü ashi

Kohima, Aug 24 (TYO) : Kodangsa nisung kari government-i aibelenba anema ola adokdir, yimsüsürtemi item olaji mangashi ama metoktsüi item aibelentemji repranga metongshitsü asoshi külemi inyaktsüla ta NPF tir Wb. Dr. Shurhozelie Liezietsu-i metetdaktsü.
“Nenok yimsüsürtemi yimten khuret külemi abentsüla kechiyong government nung nisung kati aibelenba ajanga ajak menentsü,” ta tanü Bodbar nü Kohima nung NPF Central Executive Council senden alidang Dr. Liezietsu-i metetdaktsü.
Nagaland sorkar nungbo NPF teloki anir ajak ka dang, opposition mali saka state nungbo tangar yimten teloka lir asünungji, yimbazüa malitsüla aser tangari asenok aitsübaji maongka amai agizüka aibelena lira metongshir tajungba inyaktsü merangtsüla ta NPF tirisa metetdaktsü.
Paisa NPF lenirtem dang 2018 state elections atema renemtsü ayongzük.
Manipur nungbo election agitsü ita trok dang lir aser Nagaland nung ita 17 shi lir, anungji yimbazüa melii renemshitsü mapang tongogo ta paisa ashi.
Iba senden nung Nagaland Home Minister, Y Patton, Public Health Engineering minister, Tokheho Yepthomi aser NPF Secretary General aser Rajya Sabha M.P. K G Kenye nungertemi tajungshi o jembia liasü.
Iba senden nung NPF working president, Huska Yepthomi menden liasü aser State Chaplain Rev. Kuzierang Thou-i sarasadema senden tenzük. Iba sülen NPF Working President, Apong Pongeneri tarur pelaa agizüka jembi aser Advisor aser MLA., N Thongwangi shilem agirtem ajak dang pelaba metetdaktsü. Iba senden nung NPF Central Women Wing purtemi ken tajung ka aten.